2018 թվականի մայիսի համեմատ, 2019 թվականի նոյեմբերի 29-ի դրությամբ, Հայաստանում ստեղծվել կամ ստվերից դուրս է եկել 81534 նոր աշխատատեղ։ Ինչպիսի՞ն են ձեր դիտարկումներն այս աճի միտումների և դրանց սոցիալական ազդեցության վերաբերյալ․ «Առաջին լրատվական»-ի հարցին վարչապետի խորհրդական Մեսրոպ Առաքելյանը պատասխանեց․ «Հեղափոխությունից ի վեր հարկային վարչարարության և հեղափոխության ազդեցության հետևանքով մենք ունեցանք գրանցված աշխատակիցների թվաքանակի աստիճանաբար թվական աճ, որն այսօր հասնում է մոտ 100 հազարի։ Այս միտումը բաժանենք երկու կոմպոնենտի՝ նոր ստեղծված և չգրանցված։ Ցավոք, չկա այն տեղեկատվությունը, թե աշխատակիցների որ մասն էր նախկինում ստվերում, և որ մասն է նոր սկսել աշխատել։ Սակայն ակնհայտ է, որ չգրանցված աշխատողների թիվը գնալով նվազում է՝ ստվերից դուրս գալու գործընթացը հիմնականում եղավ հեղափոխության առաջին ամիսներին։ Այս պահին ավելի քիչ են այն ընկերությունները, որոնք ունեն չգրանցված աշխատակիցներ և նոր սկսում են այդ աշխատակիցներին գրանցել։ Այսինքն՝ այդ 80 հազար աշխատակիցների հիմնական մասն այդ ամիսներին արձանագրվեց, հիմա այդ միտումը մի փոքր ավելի քիչ է»։
Այս ցուցանիշներն աննախադեպ որակվեցին, սակայն ընդդիմախոսները նշում են, որ գրանցված աշխատողների կամ աշխատատեղերի քանակի աճն աննախադեպ չէ և, առավել ևս, դրանց սոցիալական ազդեցությունը հավասար է գրեթե զրոյի։ Ինչո՞ւ․ «Առաջին լրատվական»-ի հարցին Մեսրոպ Առաքելյանը պատասխանեց․ «Թվերի մասով նշեցի, որ այստեղ երկու գործոն կա։ Խնդիրը ոչ միայն հարկերի վճարմանն է վերաբերվում, այլ քաղաքացիների գրանցումը շատ կարևոր է աշխատակիցների իրավունքների պաշտպանության տեսանկյունից»։
Մանրամասները՝ տեսանյութում։