Ադրբեջանական Trend լրատվական գործակալության փոխանցմամբ՝ Ադրբեջանի Հանրապետության պետական նավթային ընկերությունը (SOCAR) և թուրքական BOTAŞ պետական խողովակաշարային ընկերությունը հուլիսի վերջին վերսկսելու են Թուրքիայի տարածքով ադրբեջանական գազի փոխադրմանն առնչվող տարանցիկ համաձայնագրի շուրջ բանակցությունները։ Այս մասին այսօր հայտարարել է SOCAR-ի ղեկավար Ռովնագ Աբդուլաևը։
Վերջինիս խոսքերով՝ ավելի վաղ բանակցային գործընթացը որոշակիորեն դանդաղել է, սակայն հուլիսի վերջին դա բավական կակտիվանա՝ վերջնական արդյունքին հասնելու համար։
Աբդուլաևը նաև նշել է, որ SOCAR-ը «Շահ Դենիզ» գազային հանքավայրի մշակման գծով իր օտար գործընկերների հետ դիտարկում է Հարավկովկասյան («Բաքու-Թբիլիսի-Էրզրում») գազատարի ադրբեջանական հավածի ընդլայնման կամ էլ խողովակաշարի նոր ճյուղի կառուցման հնարավորությունը։
Թուրքիայի հետ տարանցիկ համաձայնագրի կնքումն անհրաժեշտ է ադրբեջանական գազի, և մասնավորապես «Շահ Դենիզ»-ի գազի դեպի Եվրոպա տարանցման համար։ Այսօր SOCAR-ը բանակցություններ է վարում ադրբեջանական գազի պոտենցիալ սպառողների և փոխադրողների հետ։ Սակայն այդ պայմանագրերը կարող են կնքվել միայն Թուրքիայի հետ տարանցիկ համաձայնագրի կնքումից հետո։
«Շահ Դենիզ»-ի պաշարները գնահատվում են 1.2 տրիլիոն խորանարդ մետր։ Կանխատեսվում է, որ «Շահ Դենիզ»-ի երկրորդ մշակման փուլի սկզբում տարեկան կարդյունահանվի 9 միլիարդ խորանարդ մետր գազ, ինչը հետագայում կհասցվի 25 միլիարդ խորանարդ մետրի։
Հիշեցնենք, որ սրանից առաջ էլ ադրբեջանական լրատվամիջոցները հայտարարել են, որ Թուրքիայի վարչապետ Էրդողանն Ադրբեջան է այցելելու հենց հուլիսի վերջին։
