«Առաջին լրատվական»-ի զրուցակիցն է ՀԱԿ վարչության անդամ, «7- ի» գործով նախկին քաղբանտարկյալ Գրիգոր Ոսկերչյանը:
-Պարոն Ոսկերչյան Տիգրան Սարգսյանի հրաժարականը շատերը պայմանավորում են քառյակի գործունեության ճնշմամբ: Կիսո՞ւմ եք այդ տեսակետը, և ո՞րը կլինի քառյակի հաջորդ անելիքը:
–Ես կարծում եմ՝ նախ և առաջ, այս գործընթացը գեներացրել են քառյակի քայլերը, և կարծում եմ, որ Սերժ Սարգսյանը պարզապես փորձեց այլ խաղ կազմակերպել դրա հիման վրա, բայց վերջին պահին նրան չհաջողվեց իրագործել իր մտածածը:
-Ի՞նչ էր մտածել իրագործել:
–Այս նույն քառյակի բաժանումը, պառակտումը և քառյակի առանձին կուսակցություններին ապագայի մասով գործընկեր դարձնելը: Դա իրեն չհաջողվեց, և, վերջին հաշվով, իմաստազրկվեց Տիգրան Սարգսյանին աշխատանքից ազատելը:
–Քառյակի միավորման առաջին պայմաններից, պահանջներից մեկը եղել էր Տիգրան Սարգսյանի կառավարության հրաժարականը: Ի՞նչ համատեղ գործունեություն են հիմա իրագործելու. այդ ուժերից առնվազն երկուսը նախագահի հրաժարական չեն պահանջում:
–Նախ այսպես ասեմ՝ քառյակը չի կայացել այդ պայմանով, միասնական գործունեության պայման չի եղել կառավարության հրաժարականի պահանջը: Դա սկսվել է շատ վաղուց՝ օրենսդրական գործունեությամբ, երկրում տիրող իրավիճակի գնահատմամբ, պարզապես էտապային իմաստով մի հանգրվան էր կառավարության հրաժարականի պահանջը. դրանով չի սկսվել և դրանով չի ավարտվի: Արդեն և՛ ԲՀԿ-ն է հայտարարել, որ գլխավորն իր համար անձերը չեն, այլ գոյություն ունեցող խնդիրների լուծումը, առավել ևս ՀԱԿ-ը հայտարարել է, որ մեզ համար որևէ նշանակություն չունի, թե ում կնշանակեն վարչապետ: Դա ասել են մինչև վարչապետ նշանակելը և դրանից հետո։ Խնդիրն անձերը մեջ չեն, իմաստ չունի քննարկել անգամ, թե այս կամ այն թեկնածուն է ավելի լավ կատարելու այն ծրագիրը, որ, ընդհանուր առմամբ, որդեգրել են հանրապետական կուսակցությունը և Սերժ Սարգսյանը:
Վերջին հաշվով՝ որքան էլ այս կամ այն կողմ տատանվեն քառյակի տարբեր անդամներ, միակ գլխավոր ուղղությունը լինելու է էապես փոխել երկրում տիրող իրավիճակը, պետք է հիմնավոր իշխանափոխություն: Այս իշխանությունները, պարզապես վարչապետ ու նախարար փոխելով, այդ խնդիրները չեն կարողանա իրականացնել:
–Բայց այդ պահանջը չկա, այդ ուժերից երկուսը չեն դնում համակարգային փոփոխության՝ նախագահի հրաժարականի պահանջ:
–Չկա, ուրեմն կշարունակեն այն ուժերը, որոնց մոտ այդ պահանջը կա: Ովքեր կմիանան՝ կմիանան, ովքեր կհամարեն, որ իրենց բավարարում է այս իրավիճակը՝ լավ: Ամեն մեկն ինքն է որոշում իր քաղաքականությունը, պրոբլեմատիկ բան չկա՝ քառյակը եռյակ կդառնա կամ հնգյակ, մենք շարժվում ենք առաջ: Մենք՝ ՀԱԿ-ը, հայտարարում ենք, որ այսպիսին են մեր սկզբունքներն ու դիրքորոշումները: Այն, ինչ հնարավոր է ընդհանուր ուժերով անել, այդպես ենք անում, ինչ հնարավոր չէ՝ առանձին կանենք:
–Ձեզ համար ընդունելի կլինի՞ ինչ-որ փուլում «Օրինաց երկիր» կուսակցության հետ համագործակցությունը. նրանք կոալիցիայից դուրս են եկել և չեն բացառում, որ կարող են ընդդիմություն հռչակվել:
-Ենթադրենք, դրվեց կառավարության ծրագրին կողմ չքվեարկելու խնդիր, հիմա ով ուզում է, թող դեմ քվեարկի։ Եթե նրանք դեմ քվեարկեցին՝ մենք չենք կարող ասել՝ չէ, մենք ձեզ ընդդիմություն չենք համարում, դուք կողմ քվեարկեք: Բայց, ընդհանուր առմամբ, սկզբունքային համագործակցությունը մեր կողմից անընդունելի է:
–Ինչո՞ւ, որ ժամանակին կոալիցիայի մա՞ս են կազմել։ ԲՀԿ-ն էլ է եղել կոալիցիայի մաս, բայց հիմա համագործակցում եք:
-Այո, ԲՀԿ-ն կոալիցիայի մաս էր կազմում, բայց, ի տարբերություն ՕԵԿ-ի, մինչև Մարտի 1-ը , ԲՀԿ-ն իրեն ընդդիմություն չէր հայտարարում և ընդդիմության դիրքերից հանդես չէր գալիս: Նա հանդես էր գալիս որպես իշխանություն, դրա համար դա ցավոտ չընդունվեց: Մինչդեռ ՕԵԿ-ը շատ ընդդիմադիր դիրքերից էր հանդես գալիս: Դրանից հետո այդպիսի քայլ կատարելը չընկալվեց։ Եթե իրենք մինչ այդ էլ պրոիշխանական դիրքերից հանդես գային, ապա՝ ի՞նչ է պատահել, մարդիկ այդպես են մտածում, այդպես են վարվում:
–Այսինքն՝ խնդիրը միայն նախքան 2008-ի ընտրությունները ՕԵԿ-ի պահվա՞ծքն էր:
–Բացի դրանից , ընդամենը մեկ օր է անցել, դեռ հստակ ոչինչ չեն հայտարարել, չեն ապացուցել, թող ինչ-որ ժամանակ անցնի, ցույց տան, որ իսկապես անկեղծ են իրենց ձգտումներում: Այլապես՝ ուզեցավ վարչապետ դառնալ, հանրապետականը չպաշտպանեց, և դրանից նեղացավ ու դուրս եկավ, մենք էլ պետք է գրկաբաց ընդունե՞նք:
–Գուցե ինչ-որ բան էլ ԲՀԿ-ի՞ն է անհրաժեշտ եղել, որ ՀՀԿ-ն չի տվել, և հիմա այդ պատճառով է ընդդիմադիր դիրքերից հանդես գալիս:
–Ամեն ինչ հնարավոր է, բայց ժամանակի ընթացքում՝ 6 տարիների ընթացքում, ԲՀԿ-ն ապացուցեց, որ ինքը պատրաստ է քայլ առ քայլ շարժվել: Իհարկե, ամեն անգամ կասկածներ եղել են հասարակության մեջ, տարբեր քաղաքական ուժերի մեջ, բայց ապացուցեց, որ ինքը պատրաստ է իր ծրագրային դրույթների հետևից գնալ ու սկզբունքային որոշումներ կայացնել: ԲՀԿ-ն դա ապացուցեց, և մենք դա չենք կարող չտեսնել: Այս անգամ կմտնի կոալիցիա, այն անգամ, բայց ամեն անգամ մարդիկ ցույց տվեցին, որ իրենց համար կարևորը դա չէ: Ինչքա՞ն կասկածենք:
–ԲՀԿ-ի այժմյան գործունեությունը հանո՞ւմ է նրա վրայից 2008-ի Մարտի 1-ի մեղադրանքները:
–Դրանք բոլորովին տարբեր թեմաներ են, դրանք գումարել-հանելով չի լուծվում, չի մտնում այսօրվա քաղաքական օրակարգի մեջ, չի կարելի դրանք բերել խառնել:
–Եթե որևէ մեկը հանցագործություն է կատարում կամ մեղսակից է լինում որևէ հանցագործության, միայն ընդդիմադիր կեցվածք ընդունելը ազատո՞ւմ է պատասխանատվությունից:
–Ոչ, իհարկե, եթե նորից վերադառնանք Մարտի 1-ի դեպքերին և պարզվի, որ ինչ-որ մարդիկ ինչ-որ հանցագործություն են կատարել, ապա ի՞նչ կապ ունի՝ հանցագործությունը մնում է հանցագործություն: Բայց եթե դու լիարժեք ապացույցներ չունես, չի նշանակում՝ հիմա չպետք է համագործակցես:
–Այսինքն՝ «Փաստահավաք» խմբի զեկույցը դեռ կասկածի տա՞կ է:
–Ապացույցը դատարանի վճիռն է, ապացույցը քրեական գործերն են: Մենք հասկանում ենք, որ մնացած բոլորը կարող են քաղաքական դիրքորոշումներ լինել, վստահություն, այսպես ասած, այդ ամեն ինչ նկատմամբ չկա՝ դիրքորոշումներ ընդամենը:
–Ո՞ւմ դիրքորոշումն է: Կոնգրեսն այդ ցուցակը հրապարկեց:
-Ո՞րն է հարցի էությունը, մենք ի՞նչ չենք կարողանում գտնել կամ հասկանալ. ուզում եք հասկանալ՝ ինչո՞ւ է ՀԱԿ-ը հիմա համագործակցում ԲՀԿ-ի հետ:
–Այո, հասարակության մի ստվար զանգված, Ձեր՝ արդեն նախկին համախոհներից շատերը մեղադրում են այդ համագործակցության համար:
–Նրանք, ովքեր մեղադրում են, ովքեր կարծում են, որ ՀԱԿ-ը ճիշտ ճանապարհով չի գնում, թող չհամագործակցեն: Իսկ նրանք ովքեր կարծում են, որ մեզ Հայաստանի հասարակության, հայկական պետականության փրկության համար պետք է համագործակցել՝ թող համագործակցեն: ԲՀԿ-ն ապացուցեց, որ սկզբունքային դիրքորոշումներ ունի: Ես արդեն որևէ հիմք չեմ գտնում նրանց հետ չհամագործակցելու, նրանց հետ ճանապարհ չգնալու համար:
Լուսանկարը՝ A1plus.am-ի
