Ամերիկացի հետազոտողները պարզել են, որ հանցագործները մշտապես շփվել են սպիտակ ազգայնականների համացանցային ֆորումում` Stormfront-ում: Այս մասին գրում է The Guardian-ը:
Հայտնի է դարձել, որ Stormfront.org կայքի օգտատերերից է եղել Անդրես Բերինգ Բրեյվիկը, որը 2011-ին Նորվեգիայում 77 մարդ է սպանել, ինչպես նաև Ուեյդ Մայքլ Փեյջը, որը 2012-ին Վիսկոնսինում սիկհերի տաճարում 6 մարդու է սպանել:
Զեկույցի հեղինակ Հայդի Բայրիհը եկել է այն եզրակացության, որ 1995-ից գոյություն ունեցող վերոնշյալ կայքը պոտենցիալ հանցագործների ձևավորման «հարթակ է»: Նրա խոսքերով` այն աշխարհում «ամենախոշոր ատելության կայքն է», որը «հասարակության համար վտանգավոր մարդկանց մագնիս և սնուցող միջավայր է»:
Հետազոտողներն արդեն հայտնաբերել են մարդասպանություն գործած կայքի 10 օգտատիրոջ: Հայդի Բայրիհը նշում է նաև, որ այդ կայքը ապաստան է այն մարդկանց համար, ովքեր բախվել են կոնկրետ խնդիրների հետ, չեն կարողացել ինքնահաստատվել կյանքում, իսկ այժմ փնտրում են իրենց անհաջողություններում «մեղավոր թշնամու»:
