Երեկ հայտնի է դարձել, որ Ռուսաստանի վարչապետ Վլադիմիր Պուտինի «Կվադրիգա» մրցանակը շնորհելու համար հերթական անդամն է լքել մրցանակի հոգաբարձուների խորհուրդը: Այս մասին հաղորդում է Deutsche Welle-ն: Rhein-Neckar-Zeitung թերթին տված հարցազրույցում պատմաբան Էդգար Վոլֆրումը հայտարարել է, որ դուրս է գալիս այդ խորհրդից:
Նորագույն պատմության մասնագետն անթույլատրելի է համարել այն, որ հոգաբարձուների առանձին անդամների վրա այդ մրցանակը շնորհելու պատասխանատվություն է դրվում, այնինչ, նրանք չեն մասնակցել որոշման կայացմանը և մրցանակի շնորհման մասին իմացել են մամուլից: Նա ժյուրիի այդ որոշումը սկանդալային է անվանել՝ կարծիք հայտնելով, որ Պուտինի դեպքում պետք էր լայն քննարկում անցկացնել:
Հիշեցնենք, որ նախորդ օրը հոգաբարձուների խորհրդից դուրս գալու մասին էին հայտարարել Գերմանիայի Կանաչների կուսակցության համանախագահ Ջեմ Օզդեմիրը և Wikipedia-ի հիմնադիր Ջիմի Ուեյլսը:
Հիշեցնենք նաև, որ Օզդեմիրն իր այս քայլը բացատրել է «ժողովրդավարության և իրավական պետության կառուցման» գործում Պուտինի ներդրման վերաբերյալ ժյուրիի հետ ունեցած տարամետ դիրքորոշումներով: Գերմանիայի կառավարությանը կից մարդու իրավունքների պաշտպանը Պուտինին «Կվադրիգա» մրցանակի շնորհումը երեկ ցինիզմ է անվանել՝ նշելով, որ նախագահ եղած ժամանակ Պուտինը զբաղվել է «ժողովրդավարության քանդմամբ», «ազատությունների սահմանափակմամբ» և «Ռուսաստանը գցել է կոռուպցիայի ճանկը»:
Տեղեկացնենք, որ «Կվադրիգա» մրցանակն անվանվել է այն քանդակի պատվին, որ դրված է Բրանդենբուրգյան դարպասների վրա: Այս մրցանակը ժամանակին շնորհվել է Գերմանիայի նախկին կանցլերներ Հելմուտ Քոլին և Գերհարդ Շրյոդերին, ԽՍՀՄ նախկին նախագահ Միխայիլ Գորբաչովին, Չեխոսլովակիայի նախկին նախագահ Վացլավ Հավելին և այլն: