Ըստ «Ժողովուրդ» թերթի հրապարակած տեղեկատվության՝ նոյեմբերի 26-ին Ազգային անվտանգության ծառայությունը հայտնեց, որ բացահայտել է բարձրաստիճան պաշտոնատար անձանց կողմից 2007-2009 թթ. ընթացքում առանձնապես խոշոր չափերի կաշառք պահանջելու և ստանալու դեպք:
ԱԱԾ-ն, սակայն, չի բարձրաձայնել, թե որ պաշտոնատար անձանց մասին է խոսքը:
«Ժողովուրդ» օրաթերթը պարզել է, որ այդ գործով անցնում է 1999 թ. հոկտեմբերի 27-ի ողբերգությունը քննած դատավոր Սամվել Ուզունյանը: Երևանի բնակչուհուն առևանգելու դեպքով հարուցված քրգործով պաշտոնատար անձինք իրենց օրինական գործն անելու համար տուժողի հորից միջնորդի դեր ստանձնած մեկ այլ պաշտոնատարի միջոցով 2007-2009 թթ. պահանջել և մաս-մաս ստացել են առանձնապես խոշոր չափի կաշառք, բայց ենթադրյալ հանցանք կատարածներն այդպես էլ պատասխանատվության չեն ենթարկվել: Միջնորդն էլ տուժողի հորը վերադարձրել է կաշառքի միայն մի մասը:
Հայտնի է դարձել, որ այդ գործը հանձնվել է Հատուկ քննչական ծառայությանը։
ՀՔԾ մամուլի խոսնակ Մարինա Օհանջանյանից հետաքրքրվեցինք, թե ինչ ընթացքի մեջ է պաշտոնատար անձանց քննությունը։
«Ձեր նշած քրեական գործը նոր ենք ընդունել վարույթ, կատարվում է նախաքննություն»,- ասաց Մարինա Օհանջանյանը։