Ադրբեջանական Contact.az կայքի փոխանցմամբ՝ ադրբեջանական ընդդիմադիր «Մուսավաթ» կուսակցության գրասենյակում տեղի են ունեցել «Ադրբեջանի բանտերում իրավիճակ» խորագրով հասարակական լսումները։
Ապրիլի 2-ի միտինգի ժամանակ ձերբակալվածների իրավունքների պաշտպանության կոմիտեի ղեկավար Վիդադի Միրքյամալը հայտաարել է, որ բանտային պայմանները չեն համապատասխանում ժամանակակից պահանջներին։ Քաղաքացիները փաստացիորեն զրկված են ինքնապաշտպանության իրավունքից։ Նրանք զրկված են նաև քաղաքական իրավունքից։ Նրանց ձերբակալում են չարտոնված ակցիաներին մասնակցելու համար՝ վերածելով քաղբանտարկյալների։ Այդ բոլոր ձերբակալությունների նպատակը ժողովրդավարության համար պայքարող մարդկանց կամքը կոտրելն է։
Նախկին քաղբանտարկյալ Էյնուլա Ֆաթուլաևը բարձրացված այդ խնդիրը որակել է որպես ցավոտ ու այժմեական. «Քաղբանտարկյալների ու մյուս բանտարկյալների միջև հարաբերությունները բավական բարդ են։ Միակ հույսը հասարակության աջակցության վրա է։ Հենց դա է ինձ աջակցել քառամյա ազատազրկման ժամանակ։
Որպեսզի բանտերում իրավիճակը փոխվի դեպի լավը, անհրաժեշտ է հուսալի դիտարկող մեխանիզմ։ 6 տարի առաջ իրավապաշտպանները հանգիստ կարող էին այցելել կալանավայրեր։ Մինչդեռ այժմ այդ գործընթացը կորցրել է իր այժմեականությունը, քանի որ նվազել է հասարակական վերահսկման նկատմամբ վստահությունը, և անհրաժեշտ է տվյալ հարցում ներգրավել միջազգային իրավապաշտպան կառույցներին։
Բանտերում մարդկային հարաբերությունները մնացել են նույնը, ինչ որ խորհրդային ժամանակներում էր։ Բանտերում չի վերահսկվում սննդի գործընթացը, իսկ բանտարկյալներն էլ նախընտրում են դա ստանալ դրսից։ Թիվ մեկ գաղութի պայմանները չեն համապատասխանում անգամ նվազագույն պահանջներին։ Օրինակ՝ այնտեղ պահվող 1000 բանտարկյալներին բաժին է ընկնում ընդամենը 23 արտաքնոց և 9 լոգարան։ Մեծ խցերում միաժամանակ պահվում է 100-150 բանտարկյալ, ինչը հակասանիտարական է։
Պատժախցերն էլ կատարում են ոչ թե պատժի սենյակի դեր, այլ՝ անմարդկային վերաբերմունքի ու մարդու արժանապատվության ոտնահարման։ Որպեսզի այդ ամենին վերջ տրվի, պետք է դա հանձնել հասարակության ու միջազգային հանրության դատին»։
Հիշեցնենք, որ «Ռեալ Ադրբեջան» և «Ամենօրյա Ադրբեջան» անկախ թերթերի հիմնադիր Էյնուլա Ֆաթուլաևն ազատ է արձակվել մայիսի վերջին Ադրբեջանում տեղի ունեցած համաներման արդյունքում։ 2007 թվականի հոկտեմբերի 30-ին Բաքվի դատարանը քրեական օրենսգրքի 214-րդ հոդվածի 1-ին կետով (ահաբեկչական սպառնալիք), 213-րդ հոդվածի 2-րդ կետով (հարկերից խուսափում) և 283-րդ հոդվածի 2-րդ կետով (ազգամիջյան թշնամանքի հարուցում) նրան դատապարտել էր 8.5 տարվա ազատազրկման:
Ֆաթուլաևի գործը բաղկացած էր 19 հատորից, որից 17-ը վերաբերում էր հարկերից խուսափելուն: Միջազգային հանրությունն անհեթեթություն է անվանել Ֆաթուլաևին ներկայացված այդ մեղադրանքները:
Ի դեպ, Ֆաթուլաևը «Ռեալ Ադրբեջանի» համարներից մեկում նշել էր, որ Իրանին հարված հասցնելու հարցում Բաքվի կողմից ԱՄՆ-ին աջակցելը խոցելի է դարձնում Ադրբեջանը և կարող է հանգեցնել Իրանի կողմից Ադրբեջանին ռազմական հարված հասցնելուն: Ֆաթուլաևը նշել էր նաև իրանական հավանական հարվածների ադրբեջանական թիրախները: