Խոսակցություններ են շրջանառվում, նաև մամուլում հրապարակումներ են եղել, որ նոր կառավարության կազմում կարող է տեղ ունենալ Գյումրիի նախկին և օդիոզ քաղաքապետ Վարդան Ղուկասյանը: Վարդան Ղուկասյանը մի քանի օր առաջ այս կապակցությամբ մամուլում ասել էր, թե «ինչպես որ Աստված կամենա»:
Պարզ չէ, թե ո՞ւմ նկատի ունի Վարդան Ղուկասյանն «Աստված» ասելով: Կասկածի տակ չենք առնում նրա քրիստոնեականությունը, պարզապես Հայաստանում օդիոզ իշխանավորների համար աստվածը փողն ու իշխանությունն են, այդ պահին իշխանության բուրգի գագաթին կանգնածները:
Ինչ կկամենա «Աստված»՝ պարզ կլինի մի քանի օրից: Սակայն պետք է ասել, որ Վարդան Ղուկասյանի՝ կառավարությունում հայտնվելը կամ որևէ այլ բարձր պաշտոնի վերադառնալը լիովին բխում է Հովիկ Աբրահամյանի վարչապետացման և հայաստանյան քրեական-օլիգարխիկ համակարգի ռեաբիլիտացման տրամաբանությունից:
Ղուկասյանը այս համակարգի կարկառուն ներկայացուցիչներից մեկն է և ինչո՞ւ չպետք է ռեաբիլիտացվի, առավել ևս, որ ամիսներ առաջ նա, այսպես ասած, ստացել է այդ իրավունքը Սերժ Սարգսյանից, որն այցելել էր Գյումրի և այնտեղ փողոցում քայլել ու զրուցել է Վարդան Ղուկասյանի հետ: Այնպես որ, Ղուկասյանի ռեաբիլիտացիայի ցրցամը դեռ այն ժամանակ է տրվել, հիմա էլ, այսպես ասած, կար ու ձևն են ավարտին հասցնելու: Առավել ևս, որ Վարդան Ղուկասյանին հայաստանյան քրեական-օլիգարխիկ համակարգը, այսպես ասած, պարտք է մնացել դեռ 2007 թվականից հետո, երբ նա հրաշքով ողջ մնաց ՀՀԿ խորհրդի նիստից հետո Գյումրի ուղևորվելու ճանապարհին տեղի ունեցած մահափորձից:
Մահափորձը մինչև այսօր բացահայտված չէ, ըստ որում՝ կարծեք թե որևէ մեկն այդ առումով առանձնապես մեծ շահագրգռվածություն չի էլ դրսևորում: Ի դեպ, ՀՀԿ-ի խորհրդի այդ նիստը Անդրանիկ Մարգարյանի հանկարծամահ լինելուց հետո էր տեղի ունեցել: Ավելին, մամուլում հրապարակվեց այդ նիստի վերաբերյալ մի քանի տեղեկություն, ի մասնավորի և այն, որ նիստի ընթացքում պետք է հնչեին ՀՀԿ ղեկավարի վերաբերյալ թեկնածուական առաջարկներ, և Վարդան Ղուկասյանը պետք է Հովիկ Աբրահամյանի անունն առաջարկեր, սակայն չգիտես ինչու չի արել՝ լռել է: Հետագայում, Վարդան Ղուկասյանը մի քանի անգամ տարբեր առիթներով ակնարկել է ինչ-որ բաներ Հայաստանի իշխանական համակարգին: Վերջին անգամ Ղուկասյանը նմանօրինակ ակնարկներ արեց իր դստեր փեսացուի սպանությունից հետո: Ի դեպ, հետաքրքրական է և այն, որ Վարդան Ղուկասյանը Գյումրիի քաղաքապետի պաշտոնից հրաժարական է տվել հենց Հովիկ Աբրահամյանի հետ զրույցից հետո: Մինչ այդ Ղուկասյանը բավական ագրեսիվ կերպով պաշտպանում էր իր դիրքերը և անում ակնարկներ, որ այդ դիրքերին սպառնալու դեպքում իշխանությունները կարող են և փոշմանել: Եվ միայն Հովիկ Աբրահամյանի հետ զրույցից հետո, երբ վերջինս հատուկ դրա նպատակով գնաց Գյումրի, Ղուկասյանը համաձայնեց հեռանալ: Սակայն, ռեաբիլիտացիան կարծեք թե իրեն ուշանալ չի տալիս: Հովիկ Աբրահամյանը նրան հեռացրեց, Աբրահամյանն էլ նրան կվերադարձնի: Իսկական «Կովկասի գերուհի»:
Այսպիսով, Վարդան Ղուկասյանը առկա իշխող համակարգի առանցքային դեմքերից մեկն է, և առանց նրա բնականաբար չի կարող ռեաբիլիտացիան ամբողջական լինել, իշխող քրեական-օլիգարխիկ համակարգը չի կարող ամբողջությամբ «ռեսթարտ» լինել:
