Շվեյցարիա-Հայաստան ընկերակցության նախկին նախագահ Սարգիս Շահինյանը, «Առաջին լրատվականի» հետ զրույցում անդրադառնալով սեպտեմբերին կայանալիք Հայրենիք-Սփյուռք համաժողովին և Հայաստանում երկպալատ խորհրդարան ստեղծելու ուղղությամբ այս ընթացքում արված աշխատանքներին, նշեց. «Կարծում եմ աղցանի մեջ մի մաս է ավելանալու, որը կարող է աղցանին ընդհանրապես ոչ մի բան չտալ։ Ես մտավախություն ունեմ, որ սեպտեմբերի ժողովը տխուր պատկեր պիտի ցույց տա։ Հայաստանում կան ճակատագրական խնդիրներ, և ճիշտ չէ, որ սրանք Սփյուռքը լուծի։ Այն ստրուկտուրալ դժվարությունները, որոնք կան Հայաստանում, Հայաստանը պիտի լուծի։ Սփյուռքը կարող է իր մասնակցությունը բերել որոշ չափով միայն, ժողովրդակացության զարգացման խնդրի մեջ, բայց վերջ ի վերջո Հայաստանը ղեկավարողը Հայաստանի հայերը պիտի լինեն։ Սա մի սկզբունք է, որն անտարակույս է»։
Սարգիս Շահինյանի խոսքով՝ Սփյուռքի մասին Հայաստանը մտածում է, երբ դանակը արդեն հասել է ոսկորին, ինչը, ըստ նրա, լուրջ չէ. «Հայաստանի հիմնական խնդիրները Սփյուռքը չի կարող լուծել։ Մյուս կողմից՝ նստել և խորհել Սփյուռքի մասին, երբ միայն ծանր դժվարություններ են առաջանում, Հայաստանի կառավարության կողմից ուղղակի էթիկայից հեռու մոտեցում է։ Այս ամենը իրականության մեջ պիտի խորհվեր 1991-ին, ոչ 20 տարի անց»։