«Շեցսալե» շարժման անդամները քննադատել են Խորհրդարանի նախագահ Արչիլ Թալակվաձեին տնտեսական ճգնաժամի այս պայմաններում Կոմո լիճ ուղևորության համար: Ակտիվիստները խոսնակին առաջարկել են թրջվել խորհրդարանի շենքի մոտ գտնվող ավազանում, որպեսզի զգա, թե ինչ վիճակում էին այն ցուցարարները, որոնց ցրել էին ջրային թնդանոթով՝ գրում է kavkaz-uzel.eu-ը:
«Կովկասյան հանգույց»-ը տեղեկացրել է, որ նոյեմբերի 14-ից Թբիլիսիում անց են կացվում բողոքի ցույցեր․ մարդիկ դժգոհ են ընտրական համակարգը փոփոխելու նախագծի համար խորհրդարանական քվեարկության ձախողումից: Ցուցարարները պահանջում են, որ կառավարությունը հրաժարական տա, իշխող «Վրացական երազանք» կուսակցության առաջնորդ Բիձինա Իվանիշվիլին հեռանա իշխանությունից և արտահերթ խորհրդարանական ընտրություններ անցկացվեն ժամանակավոր կառավարության և անկախ ընտրական վարչակազմի պայմաններում: «Վրացական երազանքի» գործողությունները նվազեցրել են կուսակցության՝ հաջորդ ընտրություններում հաղթելու շանսերը և խարխլել իշխանություններին ուղղված վստահությունը Վրաստանի միջազգային գործընկերների կողմից, որոնցից կախված է երկրի բարեկեցությունը՝ ասում են «Կովկասյան հանգույց» -ի կողմից հարցված վերլուծաբանները: