Երևանում այսօր գումարվել է Ֆինանսական հետախուզության մարմինների Էգմոնտ խմբի պլենար նիստը, որին ներկա էին ՀՀ գլխավոր դատախազ Աղվան Հովսեփյանը, ոստիկանության պետ Ալիկ Սարգսյանը, արդարադատության նախարար Հրայր Թովմասյանը, ԱԳ փոխնախարար Արման Կիրակոսյանը, Պետական եկամուտների կոմիտեի նախագահ Գագիկ Խաչատրյանը և այլ բարձրաստիճան հյուրեր:
Պլենար նիստի բացման ժամանակ ԿԲ նախագահ Արթուր Ջավադյանը նշել է, որ Հայաստանի Հանրապետությունը մեծապես կարևորում է փողերի լվացման և ահաբեկչության ֆինանսավորման (ՓԼ/ԱՖ) դեմ պայքարը, ինչպես երկրում համապատասխան կառույցների ու համակարգերի զարգացման, այնպես էլ միջազգային նախաձեռնություններին ակտիվ մասնակցության տեսանկյունից: Այս առումով շատ կարևոր է ֆինանսական հետախուզության մարմինների Էգմոնտ խմբի դերը: Էգմոնտ խմբում ներկայացված յուրաքանչյուր երկրում մեծ ջանքեր են գործադրվում ՓԼ/ԱՖ դեմ պայքարի համակարգի կատարելագործման ուղղությամբ, Հայաստանը ևս այդ ուղղությամբ շարունակական ու հետևողական քայլեր է ձեռնարկում:
Հիշեցնենք, որ հուլիսի 11-ին ֆինանսական հետախուզության մարմինների Էգմոնտ խումբն իր աշխատանքներն էր սկսել Երևանում՝ Էգմոնտ խմբի կոմիտեի նիստի գումարմամբ: ԿԲ հասարակայնության հետ կապերի ծառայության հաղորդագրության համաձայն՝ հուլիսի 12-ին Էգմոնտ խմբին անդամակցող շուրջ 30 երկրների միջև ստորագրվել են փողերի լվացման և ահաբեկչության ֆինանսավորման դեմ պայքարի ոլորտում համագործակցության վերաբերյալ 50-ից ավել փոխըմբռնման հուշագրեր:
