Հայաստանում ԱՄՆ դեսպանի պաշտոնում առաջադրված Ջոն Հեֆերնը, ելույթ ունենալով Սենատի արտաքին հարաբերությունների հանձնաժողովում չորեքշաբթի օրը տեղի ունեցած լսումներին, անդրադառնալով Օսմանյան կայսրությունում ապրող 1.5 միլիոն հայերի սպանության փաստին, այդ իրադարձություններին չի տվել «ցեղասպանություն» որակումը:
Այս առնչությամբ «Առաջին լրատվականը» զրուցեց ՀՅԴ բյուրոյի Հայ դատի և քաղաքական հարցերի գրասենյակի պատասխանատու Կիրո Մանոյանի հետ։ Վերջինիս խոսքով, թեև նշանակված դեսպանը չի գործածել «ցեղասպանություն» բառը, սակայն դա չի նշանակում, թե նա «կասկածի տակ է դնում այդ բառը»։
Անդրադառնալով Դեմոկրատական կուսակցության սենատոր Ռոբերտ Մենենդեսի՝ Հեֆերնին ուղղած հարցերին, Կ.Մանոյանը շեշտեց, որ սենատորը ևս մեկ անգամ հաստատեց փաստը, որ Պետքարտուղարությունը «մի քիչ անհարմար վիճակի մեջ է դնում իր դիվանագետներին և նրանց ուղարկում է մի երկիր, բայց հնարավորություն չի տալիս, որ մասնակցեն Ոգեկոչմանը»։
Նրա խոսքով՝ Սենատի քննարկումներին հաջորդած օրերին Ջոն Հեֆերնին տարբեր գրավոր հարցեր կարող են ուղղվել, որից ելնելով էլ Ամերիկայի Հայ դատի հանձնախումբը կհանգի որոշակի եզրակացության։