Կենտրոն և Նորք-Մարաշ վարչական շրջանների ընդհանուր իրավասության դատարանում Արշակ Վարդանյանի նախագահությամբ այսօր հետաձգվեց Վազգեն Խաչիկյանի և մյուսների վերաբերյալ՝ սոցիալական ապահովության ոլորտում կատարված չարաշահումների և հափշտակությունների գործով դատական նիստը:
12 ամբաստանյալներից դատարան էին ներկայացվել 11-ը: Ամբաստանյալ Հովհաննես Գրիգորյանի վերաբերյալ տեղեկանք էր ստացվել դատապարտյալների հիվանդանոցից:
Ըստ այդ տեղեկանքի՝ Հովհաննես Գրիգորյանի առողջական վիճակը վատթարացել է, այսօրվա նիստին նա մասնակցել չի կարող:
Նախագահողը պարզաբանեց, որ խոսքը վիրուսային հիվանդության մասին է, շատ լուրջ բան չէ, և հաջորդ նիստի անցկացման համար այդ հիվանդությունը խոչընդոտ չի լինի: Իսկ այսօրվա նիստը ամբաստանյալին չներկայացնելու պատճառով հետաձգվեց:
Այսօրվա դատական նիստին կանչված 26 վկաներից ներկայացել էին 7-ը: Նախագահողն ընթերցեց չներկայացածների անունները, ոմանց վերաբերյալ կկայացվի բերման ենթարկելու որոշում:
Վկաներից մեկի վերաբերյալ տեղեկություն էր ստացվել, որ վկան մահացել է:
Մի քանի տարեց վկաների առողջական վիճակը լավ չէ:
Նախագահողը տեղեկացրեց նաև, որ ամբաստանյալ Աշոտ Աբրահամյանի առողջական վիճակի վերաբերյալ նրա շահերի պաշտպան Լիպարիտ Ավետիսյանի միջնորդությամբ կատարված հարցման պատասխանը ստացվել է, այն կհրապարակվի հաջորդ դատական նիստին: Որպես նախնական տեղեկություն՝ նախագահողը հայտնեց, որ ամբաստանյալ Աբրահամյանի առողջական վիճակը ստաբիլ է, անհանգստանալու պատճառ ներկա դրությամբ չկա:
Առաջիկա դատական նիստերը կանցկացվեն չորեքշաբթի օրերը, ինչպես նախապես որոշել էր դատարանը, այսինքն՝ ապրիլի 23-ին և 30-ին:
