Մամուլում հրապարակվել էր տեղեկություն այն մասին, որ նոյեմբերի 16-ին «Արմավիր» քրեակատարողական հիմնարկում ինքնասպանություն է գործել 19-ամյա մի երիտասարդ։ Նշված էր նաև, որ ինքնասպանություն գործած երիտասարդը՝ Սարգիսը, վերջերս էր տեղափոխվել «Արմավիր» ՔԿՀ, նա մանկատանը մեծացած խեղճ տղա էր։
ՀՀ արդարադատության նախարարությունից փորձեցինք ճշտել, թե որն է եղել ինքնասպանության պատճառը։
«Արդարադատության նախարարի հրամանով՝ «Արմավիր» ՔԿՀ-ում նոյեմբերի 16-ին կախված վիճակում հայտնաբերված կալանավորված անձի մահվան դեպքի հանգամանքները պարզելու նպատակով նշանակվել է ծառայողական քննություն՝ Քննչական կոմիտեում հարուցված քրեական գործին զուգահեռ։
Ծառայողական քննությունից բացի՝ ՀՀ արդարադատության նախարար Ռուստամ Բադասյանի նախաձեռնությամբ, համապատասխան մասնագետների ներգրավմամբ, կիրականացվի 2019 թվականին քրեակատարողական հիմնարկներում տեղի ունեցած ինքնասպանության դեպքերի ուսումնասիրություն քրեակատարողական հիմնարկներում նման դեպքերի պատճառները բացահայտելու և կանխելու նպատակով»,- արձագանքեցին ՀՀ արդարադատության նախարարության հասարակայնության և տեղեկատվության վարչությունից:
