Այսօր ՀՀ էկոնոմիկայի նախարարության և «Կորպորասիոն Ամերիկա ԷսԷյ» ընկերության միջև ստորագրվեց համաձայնագիր՝ «Զվարթնոց» օդանավակայանի հարակից տարածքում ազատ տնտեսական գոտի ստեղծելու նպատակով համագործակցության վերաբերյալ:
Էկոնոմիկայի նախարար Տիգրան Դավթյանը տեղեկացրեց, որ նախապատրաստվել է որոշումների փաթեթ, որը շուտով կներկայացվի կառավարություն, և դրա ընդունումից հետո կամբողջացվի ազատ տնտեսական գոտիների մասին իրավական դաշտը:
«Առաջին լրատավականի» հարցին, թե համաձայնագրի ստորագրմանը ի՞նչ գործնական քայլեր են հետևելու, Տ. Դավթյանը պատասխանեց, որ ստեղծվելու է աշխատանքային խումբ, որտեղ ներգրավված են լինելու բոլոր շահագրգիռ կողմերի ներկայացուցիչները՝ պետական մարմիններ, Տրանսպորտի նախարարությունը, Էկոնոմիկայի նախարարությունը: Խումբը յուրաքանչյուր ամիս հանդիպումների ժամանակ կքննարկի ժամանակացույց, նախատեսվող քայլերը և կիրականացնի դրանք. «Սա բավական երկար, պրագմատիկ աշխատանք է պահանջելու բոլորիցս»:
Նախարարը նշեց, որ նախատեսվում է հանրապետությունում ստեղծել 3 ուղղվածության ազատ տնտեսական գոտիներ՝ «Զվարթնոցում»՝ գյուղատնտեսական, «Մարս» գործարանում՝ արտադրական, և ապագայում կլինի նաև տեղեկատվական տեխնոլոգիաների ուղղվածության ազատ տնտեսական գոտի:
«Կորպորասիոն Ամերիկա ԷսԷյ»-ի ներկայացուցիչ, «Արմենիա» միջազգային օդանավակայանների գլխավոր մենեջեր Մարսելո Վենդեին շեշտեց, որ հետաքրքրված են այս նախագծով և ուղևորների նոր համալիրի շինարարության ավարտից հետո հաջորդ քայլը կլինի «Զվարթնոց» օդանավակայանը դարձնել տեղափոխումների կենտրոն ու Հայաստանը կապել ամբողջ աշխարհին:
Ըստ համաձայնագրի՝ ազատ տնտեսական գոտու տարածքում կիրականացվի մեծածախ և մանրածախ առևտրային գործունեություն, մասնավորապես՝ թարմ մրգերի և բանջարեղենի մթերման, տեսակավորման, խորը սառեցման և փաթեթավորման ուղղություններով, ինչպես նաև ոսկյա իրերի և ադամանդների առևտուր: Համաձայնագրի նպատակն է խթանել առավել բարձր մրցունակություն ապահովող և արտահանման ուղղվածություն ունեցող ապրանքների արտադրությունը՝ արտաքին շուկայում հայկական գյուղմթերքների բրենդի ստեղծման միջոցով:
