Այսօր՝ նոյեմբերի 15-ին, Ազգային ժողովում շարունակում է քննարկվել 2020թ. բյուջեի նախագիծը:
«Այս վերջին երկու տարիներին միջին տարեկան ՀՆԱ-ի աճը 14 անգամ գերազանցելու է, քան եղել է մինչև հեղափոխությունը. սա հեղափոխության դրսևորո՞ւմ է, թե՞ ոչ՝ թողնում եմ իմ գործընկերներին»,- հայտարարեց «Իմ քայլը» խմբակցության պատգամավոր Հայկ Գևորգյանը:
Նա վստահություն հայտնեց, որ ՀՆԱ-ի աճը 4.9 տոկոսից բարձր է լինելու:
«Հեղափոխությունից հետո պղնձի գինը նվազել է, տրանսվերտները նվազել են, բայց տնտեսությունում ոչ մի փոփոխություն չկա: Այսինքն՝ մենք ունենք արտաքին կոնյունկտուրայից տնտեսության դիմադրողականության աճ: Պարոն Բաբաջանյան, 2019 թվականը հակառակն է, ինչը դուք նկարագրում էիք. հանքային արդյունաբերությունը կտրուկ անկում է ապրել և կտրուկ աճ է արձանագրել մշակող արդյունաբերությունը: Թե որքանով է այս բյուջեն հեղափոխական՝ ճաշակի հարց է երևի»,- ընդգծեց Հայկ Գևորգյանը՝ նշելով, որ մինչև հեղափոխությունը մեր տնտեսությունը կախված էր դրանցից:
Նրա խոսքով՝ նախկին խմբակները, որ իրենց կուսակցություն են անվանում, այլևս չեն կարողանում քննադատել տնտեսությունը և դրա համար է, որ սատանաներ են որոնում, ավանդական ընտանիքների սահմանումներ են տալիս, որտեղ կատու պահել չի կարելի. «Սատանաներ փնտրելու հարցում և այլմոլորակայինների դեմ պայքարում նրանց հաջողություն եմ մաղթում»:
Մանրամասները՝ տեսանյութում:
