Ավստրալիան ծրագրում է առաջիկա տարիներին ուրան մատակարարել ԱՄԷ: Այս մասին հայտարարել է Ավստրալիայի առևտրի նախարար Էնդրյու Ռոբը՝ Աբու Դաբի կատարած այցի արդյունքներով: Այնտեղ նա բանակցություններ է անցկացրել ԱՄԷ-ի արտգործնախարար, շեյխ Աբդալլա բեն Զաիդ Ալ-Նահայանի հետ՝ փոխանցում է ITAR-TASS-ը:
Կողմերը քննարկել են ատոմային էներգիայի խաղաղ կիրառման ոլորտում համագործակցության մասին ուժի մեջ մտած երկկողմ համաձայնագրի կատարումը:
«Համաձայնագիրը համապատասխանում է անվտանգության բոլոր պահանջներին»,- ընդգծել է ավստրալացի նախարարը: Նրա խոսքով՝ Ավստրալիան ուրանի հուսալի մատակարար է, իսկ ԱՄԷ-ն ամենայն պատասխանատվությամբ ատոմային էներգիան կկիրառի խաղաղ նպատակներով: Համաձայնագրի իրականացումը կբացի նոր երկարաժամկետ շուկա ուրանի ավստրալացի արտադրողի համար:
«2012-2013 ֆինանսական տարում ավստրալական ուրանի արտահանման ծավալը կազմել է 8391 տոննա՝ 823 մլն դոլար արժեքով,- նշել է Ռոբը:- Սկսած 2020 թվականից՝ ԱՄԷ-ն հույս ունի տարեկան ներկրել 800 տոննա»:
Ինչպես սպասվում է՝ էմիրություններում առաջին ատոմային ռեակտորը կսկսի աշխատել 2017 թվականին:
