Կիևի ներկայիս իշխանությունները փորձում են Ուկրաինայում միայն խաղաղություն ու հանգստություն ապահովել, այլ ոչ թե քաղաքացիական պատերազմ բռնկել՝ ընդունելով որոշում սեփական ժողովրդի դեմ զինված ուժի կիրառման մասին: Ճեպազրույցի ժամանակ նման կարծիք է հայտնել ԱՄՆ Պետդեպի ներկայացուցիչ Ջեն Պսակին՝ մեկնաբանելով Ուկրաինայում տիրող իրավիճակը: Այս մասին փոխանցում է ITAR-TASS-ը:
Նրանից հետաքրքրվել են, թե ԱՄՆ վարչակազմը նախկինի պես զո՞ւսպ է համարում Կիևի գործողությունները:
«Ուկրաինայի կառավարությունն աշխատում է՝ փորձելով մեղմել իրավիճակն արևելքում»,- ասել է Պսակին: Նրա խոսքով՝ Կիևի իշխանություններին հրահրում են զինված գրոհայինները, ովքեր ստեղծում են իրավիճակ, որին կառավարությունը պետք է պատասխանի: «Կառավարության վրա դրված է օրենքի ու կարգուկանոնի պահպանման պատասխանատվություն»,- ասել է նա: Նրա խոսքով՝ կառավարությունը պատասխանատու է Ուկրաինայի բոլոր մասերի համար, և նրա վրա դրված է քայլերի մշակման պատասխանատվություն, որոնք անհրաժեշտ են երկրում հանգստություն ապահովելու համար:
Հարցին՝ ինչո՞ւ ԱՄՆ-ը Յանուկովիչի ժամանակ հանդես եկավ ճիշտ հակառակ դիրքորոշմամբ, Պսակին նշել է, որ հանգամանքներն այլ էին, ցույցերը՝ խաղաղ:
Պսակին նաև նշել է, որ ԱՄՆ-ը չի դիտարկում Ուկրաինային զենք և ռազմական տեխնիկա մատակարարելու հնարավորությունը:
