Մոսկովյան հյուրանոցներում միջին գինը մեկ գիշերվա համար մայիս ամսին հասել է 173 եվրոյի, որն ամենաթանկն է եվրոպական մյուս բոլոր մայրաքաղաքների շարքում: Այս մասին վկայում են hotel.info օնլայն պատվիրման համակարգի տվյալները:
«Չնայած ավելի քան 25%-ով միջին գների իջեցմանը՝ Օսլոյի հյուրանոցները քիչ են զիջում Մոսկվայի հյուրանոցներին և զբաղեցնում են երկրորդ տեղը: Դեռևս անցյալ տարի այստեղ ամենաբարձր գներն էին մեկ գիշերվա համար»,- նշվում է ծառայության տվյալներում, որը հրապարակել է RIA-Novosti գործակալությունը:
Եվրոպական առաջատարների հնգյակը այս վարկանիշային ցուցակում զբաղեցնում են Ստոկհոլմը (158 եվրո), Լոնդոնը (156 եվրո) և Կոպենհագենը (140 եվրո): Համաշխարհային առաջատար է համարվում Նյու Յորքը, որտեղ միջին գինը կազմում է 189 եվրո մեկ գիշերվա համար: Հետազոտողները նշում են, որ աշխարհի հյուրանոցների միջին գինը մեկ գիշերվա համար 2011 թ.-ի մայիսի տվյալներով կազմում է 117 եվրո: Անցյալ տարվա համեմատ այն աճել է 1,79%-ով:
