Ուկրաինայում անցած տարվա նոյեմբեր ամսից սկսած անկարգությունների արդյունքում 150 մարդ անհետ կորել են: Այս մասին է հայտարարել Ամերիկայում, Եվրոպայում և Կենտրոնական Ասիայում ՄԱԿ-ի մարդու իրավունքների հարցերով Գլխավոր հանձնակատարի վարչության ներկայացուցչության ղեկավար Ջանի Մագազենին՝ ներկայացնելով ՄԱԿ-ի դիտորդների կողմից Ուկրաինայում մարդու իրավունքների իրադրության վերաբերյալ պատրաստած զեկույցը, փոխանցում է Itar-Tass-ը:
«Կարծում ենք, որ խոսքը գնում է 140-150 անհայտ կորածների մասին: Ներկա պահին հետաքննություն է գնում»,- ասել է Մագազենին: «Այս բոլոր դեպքերը կապված են այն իրադարձությունների հետ, որոնք տեղի են ունեցել անցած տարվա նոյեմբեր ամսից սկսած և որոնք ավելի կատաղի բնութագիր են կրել նոյեմբերի կեսերին, այնուհետև փետրվարին»,- նշել է Մագազենին:
Նա բացատրել է, որ հետաքննությունը վարում են Ուկրաինայի իշխանությունները, ինչպես նաև երկրում գործող Վարչության դիտորդական առաքելության ներկայացուցիչները:
«Մենք այս հարցի վերաբերյալ լրացուցիչ տեղեկատվություն տալ չենք կարող և հուսով ենք, որ այս մասին ավելին կկարողանանք պատմել մայիսի 15-ի զեկույցում կամ ավելի շուտ»,- ասել է Մագազենին:
Վարչության ներկայացուցիչը հույս է հայտնել նաև, որ երկրորդ զեկույցում ավելի պարզ կլինի, թե ով է դիպուկահարներին հրամայել փետրվարյան անկարգությունների ժամանակ կրակել մարդկանց վրա: Հրապարակված 28-էջանոց փաստաթղթում այդ մասին չի խոսվում:
Զեկույցում հապարակված տվյալներով՝ Կիևում անկարգությունների ժամանակ 121 մարդ է զոհվել, այդ թվում ՝ 101 ցուցարարներ և 17 իրավապահներ:
