Վերջին ուսումնասիրությունները ցույց են տվել, որ Իռլանդիան համարվում է Եվրոպայում ամենաշատ սինթետիկ թմրամիջոցներ սպառող երկիրը: Այստեղ երիտասարդության մոտ 16%-ն օգտագործել է թմրանյութեր: Ընդհանուր առմամբ՝ Եվրոպայում այդ թիվը կազմում է 5% (Լեհաստանում և Լատվիայում՝ 9%, Մեծ Բրիտանիայում՝ 8%, Լյուքսեմբուրգում՝ 7%): Այս մասին հաղորդում է Xinhua գործակալությունը:
Այս եզրակացություններն արվել են այս տարվա մայիսին Եվրոպայի ողջ տարածքում իրականացված հարցախույզի հիման վրա: Հարցման նպատակն էր պարզել, թե որքան է Եվրամիության տարածքում թմրանյութեր օգտագործող երիտասարդների թիվը: Հարցախույզին մասնակցել են ԵՄ 27 երկրների 15-24 տարեկան 12 հազար երիտասարդներ:
Պարզվել է, որ Եվրոպայում մեծ տարածում է գտել մեֆերդոն թմրանյութի օգտագործումը: Հայտնի է, որ այդ թմրանյութի առանձին տարրերի ձեռքբերումը դեղատներից արգելված չէ, այդ պատճառով մեֆերդոն ստանալը բավական հեշտ է:
Անցած տարի փորձագետները հայտնաբերել են թմրամիջոցների 41 նոր տեսակ, որոնք պատրաստվում են թե բնական, թե սինթետիկ հումքով:
