ԵԱՀԿ գործող նախագահ, Շվեյցարիայի արտգործնախարար և նախագահ Դիդիե Բուրկհալթերը երկուշաբթի Ուկրաինա կատարած այցի ժամանակ աջակցություն է հայտնել երկրում ԵԱՀԿ հատուկ դիտորդական առաքելությանը: Այս մասին հայտնում է RIA Novosti-ն՝ հղում անելով կազմակերպությանը:
Բուրկհալթերը Ուկրաինայի վարչապետ Արսենի Յացենյուկի և արտգործնախարարի պաշտոնակատար Անդրեյ Դեշչիցայի հետ քննարկել է ԵԱՀԿ գործունեությունն ու Ուկրաինայում անվտանգությանն առնչվող իրավիճակը:
ԵԱՀԿ նախագահն անհանգստություն է հայտնել՝ կապված Ուկրաինայի արևելքում հուզումների հետ: Նա կողմերին կոչ է արել զերծ մնալ ուժի կիրառումից և ցանկացած միջոցառումներից, որոնք կարող են հանգեցնել ապակայունացման:
«Հետագա սրումը կանխելն ու Հելսինկյան եզրափակիչ ակտի սկզբունքները պահպանելը մեր ընդհանուր պատասխանատվությունն են»,- ասել է նա՝ հիշեցնելով, որ Հելսինկյան եզրափակիչ ակտն իր մեջ ներառում է ուժի չկիրառում, ներքին գործերին միջամտության բացակայություն, մարդու իրավունքների հարգում և հակամարտությունների խաղաղ կարգավորում:
