Բոսնիացի lady in red-ը չորս տասնամյակ կրում է միմիայն կարմիր հագուստ: 67-ամյա Զորիցա Ռեբերնիկը նույնիսկ իր և իր ամուսնու՝ Զվոնկոյի համար գերեզմանաքարեր է պատվիրել Հնդկաստանից բերված հատուկ կարմիր գրանիտից:
Դպրոցի նախկին ուսուցչուհին ապրում է կարմիր տանը, որտեղ նա և Զվոնկոն ուտում են կարմիր ափսեներից, խմում են կարմիր բաժակներից և քնում են կարմիր անկողնում: Նույնիսկ նրա մազերը կարմիր գույն են ներկված:
«Երբ ես 18 կամ 19 տարեկան էի, հանկարծ կարմիր կրելու ուժգին ցանկություն առաջացավ,- հիշում է Զորիցան:- Իմ զարդերի և հագուստի վրա ուրիշ գույնի նույնիսկ մի կետ չպետք է լիներ»:
Ալ և վառ կարմիրը նրան «ուժի և հզորության զգացողություն» են հաղորդում:
Այս գույնի նկատմամբ մոլուցքը նրան հայտնի է դարձրել Բոսնիա և Հերցեգովինայի մայրաքաղաքից ոչ հեռու գտնվող հայրենի Բրեզա քաղաքում:
«Բոլորն ինձ ճանաչում են: Մարդիկ ինձ հաճախ տարբեր կարմիր իրեր են առաջարկում»,- ասել է Զորիցան՝ հավելելով, որ կմերժի ցանկացած «ոչ կարմիր» նվեր, որքան էլ որ այն թանկարժեք լինի:
Նա նույնիսկ թաղման արաողությանը մասնակցում է կարմիր հագուստով՝ խախտելով դարավոր ավանդույթները:
Միակ խնդիրն այն է, որ նրա ամուսինը չի նկատում, երբ Զորիցան նոր հագուստ է կրում: «Ես տարբերություն չեմ տեսնում: Ամեն ինչ նույնն է»,- ասում է նա:
