2014 թվականի ապրիլի 13-ին հաստատվեց Հայաստանի 13-րդ վարչապետի թեկնածությունը: Առաջիկա ժամանակահատվածի համար մեր գործադիր իշխանության ղեկավարը կլինի Հովիկ Աբրահամյանը:
Հիշեցնենք, որ դեռ 2008 թվականին Հայաստանում ԱՄՆ դեսպանը հետաքրքիր մի քանի դիտարկումներ էր կատարել Հովիկ Աբրահամյանի հետ հանդիպումից հետո: Այս մեջբերումները «Վիկիլիքս» հայտնի կայքից են, որտեղ տեղ էին գտել դիվանագիտական ամբողջ ներքին գրագրությունն ու թղթերը, թղթապանակները: Յուվանովիչը 2008 թվականի հոկտեմբերի 9-ին Աբրահամյանի մասին գրում է. «Նման դեմքերը Սերժ Սարգսյանին բերել են իշխանության, սակայն նրանք կարող են նաև պոտենցիալ վտանգ դառնալ Սարգսյանի համար, եթե նա գործի իրենց հետաքրքրություններին հակառակ»: Հանդիպումից մի հատված մեջբերենք. Հովիկ Աբրահամյանն իր հանդիպման ժամանակ դեսպանին ասել է, որ ամերիկացիների աջակցությունը վնաս է հասցնում Հայաստանին, և ավելի լավ կլիներ, եթե ընդդիմությունը սկսեր պատրաստվել 2012թ. խորհրդարանական ընտրություններին: Ապա 2009թ. Մարի Յուվանովիչը ևս մեկ գաղտնի նամակ է ուղարկում պետքարտուղարություն՝ անդրադառնալով Սերժ Սարգսյանի և Ռոբերտ Քոչարյանի բիզնես-բուրգերին:
«Առաջին լրատվական»-ի Realpolitik հաղորդաշարի հյուրն է «Քաղաքացիական պայմանագիր» միավորման կառավարման խորհրդի անդամ Ալեն Սիմոնյանը:
– Պարոն Սիմոնյան, ի՞նչ եք մտածում այս փաստաթղթերի մասին, որով ԱՄՆ նախկին դիվանագետները կիսվել են իրենց ղեկավարների հետ Միացյալ Նահանգներում: Դուք կիսո՞ւմ եք այն տեսակետը, որ Հովիկ Աբրահամյանը ավելի շատ մոտ է կանգնած քոչարյանական թևին իշխանության ներսում, իշխանությունից դուրս, և նրա՝ վարչապետի պաշտոնում այս նշանակումը կարո՞ղ է կապ ունենալ Սերժ Սարգսյանի և Ռոբերտ Քոչարյանի միջև համաձայնության հետ, և ինչու չէ՝ ընդհանրապես կարելի է նշել, որ սկսվել է իշխանությունը հանձնելու գործընթաց:
– Նախ՝ այն ամենը, ինչի մասին գրված է, բավական երկար ժամանակ է՝ հրապարակված է, և ուզում եմ ասել, որ մեզ և քաղաքականությամբ զբաղվող ու հետաքրքրվող մարդկանց համար որևիցե նորություն չկար այստեղ: Միգուցե ամերիկացիների համար դա նորություն է, բայց մի բան շատ միանշանակ նշված է՝ Հովիկ Աբրահամյանն այն մարդն է, որ իր սեփական բուրգը կառուցելու և իր սեփական շահերը հետապնդելու միտում ունի, և նրան միացնել այս կամ այն մարդու՝ Ռոբերտ Քոչարյանի կամ Սերժ Սարգսյանի բուրգին մի քիչ անարդար կլինի իր հանդեպ, որովհետև իր ամբողջ գործունեությամբ, ինչպես նշված էր, ինքն իր սեփական բուրգի կողմից էր:
– Այսինքն՝ կարո՞ղ ենք ասել, որ այսօր Հովիկ Աբրահամյանը սեփական քաղաքական պրոյեկտն է իրականացնում՝ ի նկատի ունենալով, որ կարող է, ինչու չէ, 2017-18թթ. նաև նախագահի հավակնություններ ուենալ:
– Միշտ, ինչու չէ՝ նա կարող է ընդունելի թեկնածու լինել. առավել ևս ինձ համար շատ կարևոր մի հայտարարություն հնչեց վերջերս Սերժ Սարգսյանի կողմից, թե ինքը միտք չունի 3-րդ անգամ որպես վարչապետ կամ որպես նախագահ առաջադրվել: Նա հստակ շեշտեց, որ դա սխալ է: Դա անուղղակի ակնարկ էր, ուղղակի խոսք էր: Կարծում եմ, որ այս որոշումը կայացվել է մի քանի գործոնների հետևանքով. նախ՝ խորհրդարանական քառյակից մի մաս պոկելու նպատակով՝ որոշ չափով ընդունելի մարդ նշանակելով, երկրորդ՝ ընդհանուր թիմին չզայրացնելու և նորմալ, հասկանալի լուծում տալու համար:
