Օրերս պաշտոնական այցով Հայաստան էր ժամանել Հունաստանի նախագահ Պավլոպուլոսը: Թեմայի շուրջ զրուցելու համար «Առաջին լրատվական»-ը հյուրընկալել է արտակարգ և լիազոր դեսպան Արման Նավասարդյանին:
Մեր զրուցակիցը կարևորելով այս այցելությունը՝ նշեց. «Ռեզերվը ավելի շատ է, քան իրականությունը: 1991 թվականին դիվանագիտական հարաբերություններ ստեղծելուց հետո Հունաստանի նախագահները շատ քիչ են այցելել Հայաստան՝ մատների վրա կարելի է հաշվել»:
Խոսելով Հունաստանի հետ տնտեսական համագործակցության մասին՝ Արման Նավասարդյանն ընդգծեց. «Մեր արտահանումը դեպի Հունաստան կազմում է ընդամենը 271 հազար դոլար, իսկ ներկրումը Հունաստանից՝ 64 միլիոնի կարգի: Պատկերացնո՞ւմ եք՝ ինչ ահռելի տարբերություն է»:
Արտակարգ և լիազոր դեսպանը ամենից շատ կարևորում է ինտեգրացիոն հարցը. «Եթե Հունաստանը մեր միջոցով մտնի ԵՏՄ շուկա, միայն կշահի, և մենք էլ, իհարկե, կշահենք»:
Անդրադառնալով թուրքական գործոնին և պանթյուրքիստական քաղաքականության աշխուժացմանը՝ Արման Նավասարդյանը նկատեց. «Թուրքիան և Ադրբեջանը, նաև՝ Նազարբաևը, ակտիվ աշխատում են ուգրո-ֆիննական ժողովուրդներին ներգրավելու ուղղությամբ: Կարծես մշակվում են թրքական միության ընդարձակման ծրագրեր: Այս ամենը հուշում է, որ մենք էլ հակառակ ուղղությամբ պետք է գործողություններ ձեռնարկենք, որոնցից մեկը կարող է լինել Հունաստանի նախագահի այցելությունը Հայաստան»:
Լիազոր և արտակարգ դեսպանը հարց է բարձրացնում՝ Հունաստան-Կիպրոս-Իսրայել եռանկյունու մեջ արդյոք Հայաստանը կկարողանա՞ գտնել համագործակցության եզրեր՝ գոնե դիտորդի կարգավիճակով. «Սա կլինի հակակշռող մի բան այն խնդիրներին, որ այսօր ձեռնարկում են Թուրքիան և Ադրբեջանը»:
Հարցազրույցն ամբողջությամբ՝ տեսանյութում: