Հայաստանի և Արցախի գործող իշխանությունների միջև կա՞ արդյոք որևէ հարցի շուրջ կոնցեպտուալ անհամաձայնություն: «Առաջին լրատվական»-ի հետ զրույցում անդրադառնալով այս հարցին՝ Արցախի «Միացյալ Հայասատան» կուսակցության նախագահ Վահան Բադասյանը նշեց, որ կարող է հայտարարվել, որ չկա, բայց կա. «Արցախի իշխանությունները հանդիսանում են դեռևս հին ռեժիմի կամակատարները, իսկ Հայաստանում հեղափոխության արդյունքում իշխանության եկած նոր իշխանություններն են, տարբեր են գաղափարները, ընկալումները, գործելաոճը, ուստի ինչքան էլ, որ Արցախի իշխանությունները փորձեն (և փորձել են) բարեփոխումներ իրականացնել և համարել, որ համահունչ են Հայաստանի նոր իշխանություններին ու կարող են համագործակցել, դա չի ստացվի, որովհետև անհամատեղելի են՝ ինչպես աղն ու շաքարավազը:
Տեսեք՝ ՀՀ երկրորդ նախագահի դատավարության առնչությամբ նրանք, ովքեր իշխանության մաս էին կազմում, ինչպես են լծվել նրա պաշտպանության գործին: Լարվածություն և անհամաձայնություններ կան…, նրանք փորձում են վերարտադրվել, նրանց մոտ ռևանշիզմի ձգտում է, բայց դա նրանք վերագրելու են գաղափարական անհամաձայնություններին: Օրինակ՝ կարող են առաջ բերել այն սխալը, որ իրեն թույլ տվեց ՀՀ արտգործնախարարը BBC-ի հետ հարցազրույցում Արցախը չհամարելով հայ ժողովրդի հայրենիք, այլ տարածք, որտեղ հայեր են ապրում: Նման հարցերը, ինչպես նաև ՀՀ իշխանության կողմից թույլ տված սխալները տեղիք են տալիս մեղադրանք հնչեցնել Արցախից: Սխալ է այն, որ այդպես էլ իշխանությունները քաղաքական գնահատական չտվեցին առաջին, երկրորդ, երրորդ նախագահների օրոք կատարված սխալներին, բացթողումներին ու հանցագործություններին, և պատշաճ կերպով չեն պատժում նախկինները»:
«Հայաստանում թող չկարծեն, որ Ն. Փաշինյանի կամ ՀՀ նոր կառավարության դեմ ինչ-որ մեկը վատ բան է ասում, Արցախում նրանց վարկանիշը դրանից ընկնում է: Արցախում արդեն սկսել է նրանց ռեյտինգը բարձրանալ: Բայց բամբասանքներ և հերյուրանքներ են տարածվում, հստակ քարոզչական աշխատանքներ են իրականացվում: ՀՀ իշխանությունների ուշադրությունը կհրավիրեի այն խնդրի վրա, որ Արցախում իսկապես սկսել է բուն դնել հակահեղափոխությունը: Հայաստանի իշխանությունը չի տիրապետում իրավիճակին. հակահեղափոխությունը դիրքավորվել է Արցախում: Դեռևս մեկուկես տարի առաջ հակահեղափոխությունն Արցախում արմատավորվել էր: Պատահական չէր Ն. Փաշինյանի օգոստոսյան այցը Ստեփանակերտ»,- նշեց Վ. Բադասյանը՝ հավելելով, որ ռևանշիստներից որևէ մեկը հետդարձի շանս չունի. «Նոր ուժեր են գալու՝ նոր մոտեցումներով, հին չարիքի վերադարձ չի լինելու»:
Մանրամասն՝ տեսանյութում: