Ռուսաստանի նախագահ Վլադիմիր Պուտինը, ինչպես նախկինում, Արևմուտքին ստիպում է կռահել իր ռազմավարությունը՝ գրում է The Washington Times-ը: Թերթը նշում է, որ Ուկրաինայում ճգնաժամի ֆոնին ամերիկացի վերլուծաբանները խոստովանում են, որ իրենք հաճախ պատկերացում չեն ունենում, թե ինչ է ծրագրում ՌԴ ղեկավարը: Փորձագետներից մեկի խոսքով՝ «մենք նույնիսկ չգիտենք՝ ինչ խաղ է նա խաղում, ավելի քիչ գիտենք նրա ռազմավարության մասին»:
Թերթը նաև նշում է, որ ռուս քաղաքագետների կարծիքով՝ Պուտինը ոչ թե ռազմավարություն, այլ առաքելություն ունի՝ «փրկել Ռուսաստանն ու ռուսներին»:
Իր հերթին, The Washington Post-ը հարցնում է՝ դեռ որքա՞ն գործողություններ պետք է կատարի Ռուսաստանը, որպեսզի առաջացնի Արևմուտքի աելի խիստ արձագանքն Ուկրաինայի արևելքում տեղի ունեցողին: Թերթի կարծիքով՝ Վաշինգտոնը պետք է Մոսկվայի նկատմամբ արագ ձեռնարկի միջոցներ, որոնք խոստացել են ԱՄՆ նախագահ Բարաք Օբաման և պետքարտուղար Ջոն Քերին, այլապես նա կարող է կորցնել Ուկրաինայի հարցում մնացած հեղինակությունը ևս:
The Guardian-ը նշում է, որ Ռուսաստանի և Արևմուտքի հակամարտության մեջ անտեսվում են Ուկրաինայի ժողովրդի շահերը: Ինչ ճանապարհ էլ ընտրեն Բրյուսելն ու Վաշինգտոնը, նրանք պետք է հիշեն երկրի բնակչության մեծամասնության մասին, որոնք ծայրահեղականներ չեն՝ ասված է հոդվածում:
Իսկ The Times-ը Ռուսաստանի և Ուկրաինայի հակամարտությունն անվանում է երկու երկրների միջև «ամենավտանգավոր առճակատումը» ԽՍՀՄ-ի փլուզումից հետո:
