Հայաստանի համար Արժույթի միջազգային հիմնադրամը (ԱՄՀ) նվազեցրել է այս տարվա տնտեսական աճի կանխատեսումը, սակայն Վրաստանի դեպքում՝ փոքր-ինչ ավելացրել է: Այսպես, 2013թ. հոկտեմբերին լուս տեսած World ecomonic outlook-ում 2014-ին Հայաստանի համար կանխատեսված էր 4.8%, Վրաստանի համար՝ 4.9% տնտեսական աճ: Իսկ նախօրեին հրապարակված համանուն զեկույցում արդեն 2014-ին Հայաստանի համար կանխատեսված է 4.3%, Վրաստանի համար՝ 5% տնտեսական աճ:
Ավելին` Վրաստանի համար 2013-ին ԱՄՀ-ն նախկինում կանխատեսում էր ավելի ցածր՝ 2.5% տնտեսական աճ, քան Հայաստանի համար (4.6% տնտեսական աճ): Բայց փաստացի ցուցանիշը Վրաստանի համար սպասվածից լավը եղավ (2.5%-ի փոխարեն կազմեց 3.2%), Հայաստանի համար՝ սպասվածից վատը (4.6%-ի փոխարեն 3.2%):
Սա առնվազն հետաքրքիր է այն առումով, որ երկու երկրներն էլ նույն տարածաշրջանում են, և Ռուսաստանի տնտեսության վատթարացումը կարծես թե երկուսիս վրա էլ ազդելու էր: Բայց, փաստորեն, այդպես չէ: Վրաստանի տնտեսությունը արդեն լուրջ իմունիտետ ունի Ռուսաստանի նկատմամբ:
Գծագիր 1. Վրաստանի և Հայաստանի տնտեսական աճի ցուցանիշները 2009-2015թթ. 
Ընդհանրապես, Վրաստանի տնտեսության հաջողությունները սկսել են առավել ակնհայտ դրսևորումներ ստանալ թվերի մակարդակով: Վերջին տասը տարում այդ երկիրն էական առաջընթաց է ապրել: Ընդ որում՝ Հայաստանից էականորեն հետ լինելով, այժմ Վրաստանը ոչ միայն էականորեն առաջ է գրեթե բոլոր ցուցանիշներով, այլև Հայաստանի համեմատ կայուն, Ռուսաստանից հոսող տրանսֆերտներից քիչ կախվածություն ունեցող և զարգացման լավ հեռանկարներ ունեցող երկիր է դարձել:
Ինչպես երևում է Գծագիր 1-ից, 2009-ին Վրաստանի տնտեսությունը շատ ավելի քիչ անկում ապրեց, իսկ 2010-ից՝ շատ ավելի մեծ աճի տեմպեր սկսեց գրանցել, քան Հայաստանի տնտեսությունը: Գծագիր 2-ում ցույց է տրված, թե ինչպես Վրաստանն առաջ անցավ Հայաստանից իր կենսամակարդակով 2011-ին (1 շնչին ընկնող ՀՆԱ տվյալները ԱՄՀ-ինն են, որոնք փոքր-ինչ տարբերվում են Համաշխարհային բանկի տվյալներից):
Գծագիր 2. Մեկ շնչին ընկնող ՀՆԱ-ն Հայաստանում և Վրաստանում 2006-2013թթ.
Նախկինում Հայաստանում 1 շնչին ընկնող ՀՆԱ-ն ավելի բարձր էր, քան Վրաստանում, սակայն 2009-ից սկսած կենսամակարդակների տարբերությունը փոքրացավ, իսկ 2011-ից Վրաստանն առաջ անցավ Հայաստանից:
Այսպիսով, թուլացնելով Ռուսաստանից կախվածությունն ու իրականացնելով ազատական բարեփոխումներ` Վրաստանը կարողացավ ձևավորել դիվերսիֆիկացված ու կայուն տնտեսություն՝ Հայաստանին թողնելով տարածաշրջանի ամենավատ ցուցանիշներն ունեցող պետության դերում: Ընդ որում՝ խոսքը ոչ միայն տնտեսական աճին ու կենսամակարդակին է վերաբերում (որոնք ամենակարևորն են և հաճախ պայմանավորում են մնացած ցուցանիշները), այլ բյուջեին, ստվերին, գործարար միջավայրին և բազմաթիվ այլ կարևոր ցուցանիշներին, որոնց կանդրադառնանք մեր հետագա հրապարակումներում:
