Հայաստանի ներքաղաքական շաբաթն ավարտվում է քաղաքական որոշ պրոցեսների արձանագրմամբ. Հայաստանի երրորդ նախագահն ազդարարել է, թե մոտենում է քաղաքացիների հետ անկեղծ զրույցի ժամանակը: Իհարկե հանրության շրջանում այդ առնչությամբ կարծիքները կամ սպասումները տարբեր են:
Հանրային խորհրդի նախագահն էլ կարծեք թե այլևս չի թաքցնում քաղաքական անցուդարձում հայտնվելու ցանկությունը: Վազգեն Մանուկյանի ստեղծած «Վերնատուն» ակումբը կազմակերպում է հանրաժողով հանրային քաղաքական թեմաներով: Մի խոսքով՝ ինչ-որ բան կատարվում է կամ փորձ է արվում քաղաքական ակտիվության ներկայացումներ ապահովել:
Թեմայի շուրք «Առաջին լրատվական»-ի հետ քննարկմանը մասնակցեցին «Իմ քայլը» դաշինքի պատգամավոր Միքայել Զոլյանը, «Լուսավոր Հայաստան» խմբակցության պատգամավոր Կարեն Սիմոնյանը և «Քաղաքացու որոշում» կուսակցության գործադիր մարմնի անդամ Միքայել Նահապետյանը:
«Եթե Սերժ Սարգսյանը 2008թ. սկսեր ավելի պարզ խոսել ժողովրդի հետ, միգուցե իրավիճակը չհասներ նրան, որ արդեն խոսում է իր ձերբակալությունից և հնարավոր բանտարկությունից»,- այս մասին նշեց Կարեն Սիմոնյանը՝ հավելելով, որ եթե ՀՀ-ում ժամանակին ժողովրդավարական ճանապարհով գնային գործընթացները, և 2012թ. չլինեին կեղծված ընտրություններ, Հայաստանի պատմության անիվն այլ ճանապարհով կգնար, և այն զարգացումները, որ այսօր առկա են, չէին լինի:
«Պաշտպանական մի մոդել կա. նախկին այն պաշտոնյաները, ում մեղադրանք է առաջադրվում կամ ովքեր գիտեն, որ ինչ-ինչ գործերով քննությունն իրենց է մոտենում, հանդես են գալիս քաղաքական հայտարարություններով, հետո երբ քննությունն սկսվում է, նրանք հայտարարում են, որ քաղաքական հետապնդյալ են»,- նշեց Միքայել Զոլյանը՝ հավելելով, որ, թերևս, Սերժ Սարգսյանի դեպքում ևս այսպիսի պարզ հնարք է գործադրվում: Պատգամավորի դիտարկմամբ՝ Սերժ Սարգսյանի քաղաքական տեքստերը նրա ուժեղ կողմը չեն, և նրա այս հայտարարության յուրաքանչյուր նախադասությունից հարցեր են առաջանում:
Միքայել Նահապետյանի դիտարկմամբ՝ Սերժ Սարգսյանի հայտարարությունների առասպելացված տեքստերը միշտ չէ, որ փայլուն և ցնցող են լինում: «Եթե Սերժ Սարգսյանը իր քաղաքական թիմի հետ սինխրոն է, որևէ բան չպետք է ակնկալել: Սերժ Սարգսյանի թիմը մինչև հիմա չի պարզաբանում՝ ինչ կաներ, եթե ունենար երկրորդ շանս: Խոսակցությունն ընթանում է ապոկալիպսիսի և գտնված դրախտի դիսկուրսում…»:
Կարեն Սիմոնյանն ընդգծեց, որ հնին վերադարձ չի կարող լինել, դրա համար որևէ շանս չկա:
Անդրադառնալով Սահմանադրական դատարանի շուրջ ստեղծված իրավիճակին՝ Մ. Նահապետյանը նշեց, որ ՍԴ խնդիրը չի կարող լուծվել այն մասշտաբներում, որում այժմ փորձ է արվում լուծել. «Այդ հարցի լուծումը պետք է դրվեր այն ժամանակ, երբ հեղափոխական հանրույթը դեռ փողոցում էր»:
Միքայել Զոլյանը հավելեց, որ անգամ հեղափոխության ընթացքում իրավական ընթացակարգերը պահպանվել են. «Այս հարցի լուծման համար նույնպես իրավական կողմը պահպանելու խնդիր է դրված»:
Մանրամասն՝ տեսանյութում:
