Ամերիկյան Բոստոն քաղաքում ավելի քան 100 տեսաձայնագրման տեսախցիկ է տեղադրվել՝ ավանդական գարնանային մարաթոնի անվտանգությունն ապահովելու նպատակով, որը նախանշված է 2014-ի ապրիլի 21-ին: Այս մասին շաբաթ օրը հայտարարել են քաղաքի ղեկավար Մարտին Ուելշը և ոստիկանապետ Ուիլյամ Էվանսը, հայտնում է ITAR-TASS-ը: Անցած տարի մարաթոնի ժամանակ Բոստոնում ահաբեկչություն էր իրականացվել, որին զոհ է գնացել 3 մարդ:
Իշխանությունների տվյալներով՝ մեծացվել է ոստիկանների թիվը սպորտային միջոցառման անցկացման վայրում:
Եզրագծի շուրջ ոստիկանների համար կստեղծվի 50 դիտակետ: Մարաթոնի ժամանակ անվտանգությունը կապահովի ավելի քան 3 500 օրինապահ՝ մոտ երկու անգամ ավելի շատ, քան անցած տարի: Մարաթոնի մայրուղու երկայնքով պարեկություն կանի շտապօգնության 13 մեքենա և 140 բուժաշխատող: Կգործի նաև միանգամից 30 մարդու փոխադրելու համար հարմարեցված բժշկական ավտոբուս:
Հանդիսատեսին խորհուրդ են տալիս իրենց հետ մեծ պայուսակներ կամ այլ տարողունակ իրեր չտանել, չհագնել ազատ, կազմվածքը ծածկող հագուստ, գլխարկներ, դիմակներ: Չի կարելի նաև 1 լիտրից ավելի հեղուկ տանել:
2013-ի ապրիլի 15-ին Բոստոնի կենտրոնում երկու պայթյուն էր որոտացել: 3 մարդ զոհվել էր, ավելի քան 260 հոգի վնասվածքներ էին ստացել:
