ԱԺ հանձնաժողովների համատեղ նիստում բյուջե-2020-ի քննարկման ժամանակ Սփյուռքի գործերի գլխավոր հանձնակատար Զարեհ Սինանյանից հետաքրքրվեց ԱԺ ԼՀԿ պատգամավոր Մանե Թանդիլյանը։
«Պարտավորությունը միայն բարոյական է, ոչ թե օրինական։ Մեր նպատակը այս քայլով երիտասարդ մասնագետների կյանքի ուղղությունը դեպի Հայաստան շեղելն է։ Սա փորձ է մեր կողմից այս մարդկանց առհավետ կապել Հայաստանին, սակայն չկա որևէ երաշխիք, որով կարող ենք այս երիտասարդներին պրակտիկան ավարտելուց հետո գամել և ստիպել, որ մնան Հայաստանում»,-ասաց Սինանյանը։
Թանդիլյանի դիտարկմանը, որ դա ինչքան էլ լավ գաղափար է, այնուամենայնիվ պետք է այդքան գումար ծախսելուց հետո բարոյականից զատ պարտավորությունների որոշակի սահման գծել, Սինանյանը պատասխանեց. «Բոլորիս համար ակնհայտ է, որ Հայաստանում լավ կադրերի լուրջ պակասորդ կա։ Այդ մարդիկ մեզ են անհրաժեշտ, իրենք իրենց կյանքը այսպես թե այնպես շարունակելու են։ Մենք ենք շահագրգռված, որ իրենք գան, իսկ երբ գան՝ այդ մեկ տարին Գառնի-Գեղարդ գնալով չեն զբաղվելու, աշխատելու են պետական օրգաններում։ Եվ այդ մեկ տարում իրենց գիտելիքը, որը կարող էին այլ կերպ օգտագործել, օգտագործելու են ի շահ Հայաստանի։ Մենք մեր գումարի դիմաց ստանում են ակտուալ արժեք։ Սա հայրենադարձության քողարկված ծրագիր է։ Հույս ունենք՝ եթե միանգամից չմնան, ապա գոնե մի պահից հետ կվերադառնան Հայաստան»։
