ՀՀ ԱԺ ֆինանսաբյուջետային հարցերի մշտական հանձնաժողովի նախագահ Մանե Թանդիլյանը 2020 թվականի բյուջեի նախագծի քննարկման ժամանակ քննադատեց ՀՀ շրջակա միջավայրի նախարարությանը՝ հարց ուղղելով նախարարին, թե ով է մեղավոր նախարարության ոչ պատշաճ աշխատանքի համար:
Թանդիլյանը նշեց, որ 2020 թվականից օրենքի համաձայն՝ բնապահապանական ծրագերի գծով յուրաքանչյուր տարվա պետբյուջեով նախատեսվող ծախսերը չեն կարող պակաս լինել, քան այդ տարվան նախորդող երկրորդ բյուջետային տարվա բնապահպանական հարկի և բնօգտագործման վճարների գծով փաստացի հանրագումարը:
«2020 թվականին այս հաշվարկի արդյունքում պետք է մոտ 54 մլրդ դրամի բնապահպանական ծախսերի ծրագրեր ներառված լինեին 2019-ի 40 մլրդ դրամի համեմատ, այնինչ ընդհամենն ունենք 16 մլրդ գումար, մոտ 40 մլրդ-ով նվազ», – ասաց նա։
«Սա եզակի հնարավորություն է, որ դուք օրենսդրի կողմից նախատեսված երաշխիքով այնպիսի ծախսեր իրականացնեք, որը բնապահպանական խնդիները կկարողանա լուծել կամ մեղմել: Ո՞վ, ըստ Ձեզ, պատասխանատվություն պետք կրի օրենքի խախտման համար. Դո՞ւք, որ ծրագիր չեք ներկայացրել, ֆինանսների նախարարությո՞ւնը, որ մերժել է ծրագիրը, թե՞ կառավարությունը»:
