«Այսօր սեղանին դրված են արդարադատության բարեփոխումները և մեկնարկել ու մեկնարկում են այլ բարեփոխումներ: Այլ հարց է, որ քաղաքական ընդդիմադիրների ճամբարից հնչում են մշտական պնդումներ, թե օրակարգը բացակայում է»,- «Առաջին լրատվական»-ի հետ զրույցում նշեց վերլուծաբան Աղասի Մարգարյանը:
Նրա խոսքով՝ իշխանությունը, գուցեև դանդաղ, գուցեև չբավարարելով մի փոքր ավելի արմատական բարեփոխումներ սպասող շրջանակների հույսերը, բայց քայլում է առաջ: «Նախկինները ստեղծում են ոչ թե քաղաքական օրակարգ, այլ տեղեկատվական օրակարգ՝ ունենալով լայն մեդիառեսուրսներ»,- նկատեց վերլուծաբանը և հավելեց, որ քաղաքական օրակարգ պետք է ստեղծեն ինստիտուտները, օրինակ՝ Ազգային ժողովը. «Այ այստեղ մենք կաղացող քայլեր տեսնում ենք. խորհրդարանը դեռևս չի դառնում այն մարմինը, որտեղ կբևեռացվի քաղաքական պայքարը և քաղաքական օրակարգերի ստեղծումը»:
Քաղտեխնոլոգ Վիգեն Հակոբյանը, սակայն, կասկածով է վերաբերվում այն թեզին, որ Հայաստանում կա՛մ պետք է լինեն անփորձներ, կա՛մ եթե անփորձ չեն, անպայման կոռումպացված են: «Դա կեղծ դիլեմա է, որովհետև ես չեմ կարծում, որ Հայաստանի պետական կառավարման համակարգի բոլոր թեկնածուները բաժանվում են միայն այդ երկու խմբի: Բայց դա դրվեց սեղանին, և ես կարծում եմ, որ սկզբնական փուլում՝ գոնե առաջին ամիսներին, դա մարսվում էր: Բայց չքննադատելու հայտնի 100 օրը հենց նրա համար է, որ այդ մարդիկ այս կամ այն չափով այդ փորձը ձեռք բերեն կամ ավելի շուտ՝ խորանան իրենց ոլորտներում: Մինչդեռ ժամանակն անցել է արդեն, և նրանք, ովքեր դեռ այդ կլիշեներով են առաջնորդվում, ես կարծում եմ՝ թաքցնում են իրենց պրոֆեսիոնալ անկարողությունը»,- «Առաջին լրատվական»-ի հետ զրույցում նկատեց Վիգեն Հակոբյանը:
Նրա խոսքով՝ արդեն վաղուց ժամանակն է, որ իշխանությունը լրջորեն դիտարկի ռոտացիայի խնդիրը. «Եթե ինչ-որ մարդիկ դեռևս համարում են, որ իրենք անփորձ են, ապա ժամանակն է այդպիսի անձանց համակարգից հեռացնելու»:
Աղասի Մարգարյանն էլ նորմալ է համարում, որ հետհեղափոխական երկրում երկու-երեք ամիսը կադրեր փոխվեն:
Հարցազրույցն ամբողջությամբ՝ տեսանյութում:
