Ուսումնասիրելով ֆինանսական շուկան և ցուցանիշները տեսնում ենք, որ վերջին ժամանակահատվածում զգալիորեն ավելացել է Հայաստանից դեպի ԱՄՆ ֆինանսական փոխանցումների ծավալը, ընդ որում ՝ Հայաստանի տրանսֆերտային փոխանցումների հաշվեկշիռը դարձել է նույնիսկ բացասական, այսինքն՝ գումարներն ավելի շատ դուրս են եկել, քան ստացվել են։ Դա անհամեմատ ակտիվացել է հատկապես այս տարվա հունիս-հուլիս ամիսներին, մասնավորապես միայն այդ երկու ամիսներին ֆիզիկական անձանց փոխանցումներն արտերկիր հասել է շուրջ 271 միլիոն դոլարի, մինչդեռ նախորդ տարի՝ 2018 թվականի հունիս-հուլիսին Հայաստանից դուրս էր եկել 174 միլիոն դոլար, այսինքն ստացվում է, որ այս տարի արտահոսքը շուրջ 97 միլիոն դոլարով կամ 55 տոկոսով ավելացել է։
Թեմայի վերաբերյալ «Առաջին լրատվական»-ը զրուցեց Գործատուների հանրապետական միության նախագահ Գագիկ Մակարյանի հետ։
Վերջինս սա պայմանավորեց մի քանի գործոններով, որոնցից հիմնականը ԱՄՆ-ից Հայաստան աննախադեպ մեծ քանակով մեքենաների ներմուծումն է։ Մակարյանն, ընդհանուր առմամբ, դրական գնահատեց այս գործընթացը՝ նշելով, որ մտահոգվելու առիթ չկա, քանի որ նրա խոսքերով՝ շատ դեպքերում ներմուծվում են վնասված մեքենաներ, որոնք այստեղ Հայաստանում վերանորոգվում են տեղի մասնագետների կողմից, ինչն էլ իր հերթին մեր տնտեսության վրա ունենում է մուլտիպլիկատիվ ազդեցություն։
Մեր զրուցակիցը թվարկեց նաև մի քանի տարբերակներ, թե ինչպես կարելի է այդ գումարները գեներացնել ու ներդնել հենց Հայաստանի տնտեսության մեջ։
«Հայաստանը կարող է պետական աջակցության սուբսիդավորման գործիքներ ստեղծել այնպիսի ոլորտների համար, ինչպիսին է օրինակ ավտոմեքենաների վերանորոգման շուկան, դա մեզ մոտ հսկայական ծավալների է հասնում։ Արդյունքում կտեսնենք, թե դա ինչ մեծ և դրական ազդեցություն կթողնի մեր տնտեսության և այդ ոլորտում զբաղվածության վրա։
Երկրորդ տարբերակը՝ կարող է խթանել ավտոմեքենաների հավաքման արտադրությունը Հայաստանում, որովհետև այս առումով մեր օրենսդրությունը շատ-շատ բացեր ունի»,-նկատեց Գագիկ Մակարյանը։
Հարցին՝ հաշվի առնելով վերոնշյալ ցուցանիշները կապիտալի արտահոսքի վտանգ չկա՞, Մակարյանը պատասխանեց․
«Ես այստեղ խոշոր բիզնեսի մատը խառը չեմ տեսնում, կապիտալի արտահոսքի վտանգը, ռիսկը, իհարկե, կա, բայց դա այլ ճանապարհներով է արվում, խոշոր բիզնեսն այլ տարբերակներ է դրա համար կիրառում»։
Մանրամասները՝ տեսանյութում։
