«Մերձավոր Արևելքում սկսվել են աշխարհաքաղաքական վերադասավորումներ․ ԱՄՆ-ն՝ Թրամփի գաղափարների հիման վրա նոր կոնցեպցիա է մշակում, որի նպատակն է իրենց ձեռքում պահել կարևոր կենտրոնները, բայց միևնույն ժամանակ ավելի մեծ տարածաշրջանի համար պատասխանատվություն չստանձնել։ Այս իմաստով այստեղ որոշակի վակուում է առաջացել, որը Ռուսաստանն է փորձում լրացնել։ Տեսնենք, թե այս ամենն ինչ ընթացք կունենա առաջիկայում, բայց ակնհայտ է, որ ամեն րոպե այս իրադրությունը կարող է պայթել և նորից վերսկսվեն ռազմական գործողությունները։ Իսկ Թուրքիան իր հերթին փորձում է իրենց «Ազգային ուխտ»-ի խնդիրը լուծել, որն ընդունվել է 1920 թվականին Մուստաֆա Քեմալ աթաթուրքի անմիջական ղեկավարության ներքո և որը նախատեսում է ավելի մեծ սահմաններ Թուրքիայի համար, քան հիմա ժամանակակից Թուրքիան ունի և այդ սահմանի մեջ մտնում է նաև Հյուսիսային Սիրիան։ Այսինքն մենք հիմա ականատեսն ենք այն բանի, որ Թուրքիան փորձում է իրագործել վաղուց ի վեր իրենց փայփայած երազանքը՝ պանթուրքական գաղափարի իրագործումը, որը Էրդողանը նույնիսկ չի էլ թաքցնում և իր այս գործողություններով հենց դա է ապացուցում։ Սա չափազանց վտանգավոր ծրագիր է, հատկապես նաև այն դեպքում, երբ 2023 թվականին լրանում է Թուրքիայի Հանրապետության 100-ամյակը և Էրդողանն էլ բազմիցս հայտարարել է, որ 2023 թվականից հետո նրանք պետք է ստեղծեն Նոր Թուրքիա»,- «Առաջին լրատվական»-ի հետ զրույցում ընդգծեց ՀՀ ԳԱԱ արևելագիտության ինստիտուտի տնօրեն Ռուբեն Սաֆրաստյանը՝ խոսելով Սիրիայի շուրջ ստեղծված իրավիճակի և այնտեղ Թուրքիայի կողմից իրականացված ռազմական գործողությունների մասին։
Սաֆրաստյանի կարծիքով՝ ստեղծված իրավիճակում Հայաստանի կառավարության առաջնահերթ քայլերից մեկը պետք է լինի այնտեղ բնակվող մեր հայրենակիցների անվտանգությունն ու անհրաժեշտության դեպքում նաև տարհանման հարցը լուծելը։ Թեև այս փուլում նրանց անվտանգության ապահովման երաշխավորն է հանդիսանում Ռուսաստանը և Թուրքիան էլ հայտարարել է ռազմական գործողությունները դադարեցնելու մասին, սակայն ըստ Ռուբեն Սաֆրաստյանի՝ Էրդողանի այդ հայտարարություններն որևէ պարագայում արժանահավատ և վստահելի չեն կարող լինել։
«Այդ փոխհամաձայնությունը, իհարկե, կա, բայց Թուրքիան իր վրա պարտավորություն չի վերցրել, որ պետք է որոշ ժամանակ հետո իր զորքերը դուրս բերի այդ տարածքներից, այսինքն դրանք անժամկետ են մնալու այնտեղ, հետևաբար, ամեն դեպքում, զգուշավորություն պետք է ցուցաբերել»,- եզրափակեց արևելագետը։
Մանրամասները՝ տեսանյութում։
