Մարտի 1-ի գործով որպես կասկածյալ ներգրավվել են ԱԺ նախկին նախագահ Արա Բաբլոյանը, ԱԺ աշխատակազմի նախկին ղեկավարի տեղակալ Արսեն Բաբայանին մեղադրանք է առաջադրվել: Սահմանադրական դատարանը այս կազմով և այս լիազորություններով շարունակո՞ւմ ունենալ Մարտի 1-ի քրեական գործին միջամտելու հնարավորություն: «Առաջին լրատվական»-ի հետ զրույցում անդրադառնալով այս հարցին՝ իրավապաշտպան Սեդա Սաֆարյանը նշեց. «Եթե այսպիսի զարգացումներ չլինեին, հանրության մեջ շրջանառվում էր, որ ՍԴ-ն մտադրություն ունի Ռ. Քոչարյանի անձեռնմխելիության վերաբերյալ դրական եզրակացություն տալ, հետո նոր կգնա, թե կման, արդեն կարևոր չէ: Դեռևս պահպանվել է այն վտանգը, որ ՍԴ-ն քանի որ ամուր կապեր ունի նախկին իշխանությունների հետ, կարող է բոլոր գործերով, ինչքանով որ հնարավոր է, օգնել նրանց… Ես խղճում եմ ՍԴ անդամներին, ինչո՞ւ են համառորեն կառչել աթոռներից, երբ որ ցանկացած իրավիճակում նրանք չեն կարող օբյեկտիվ որոշում կայացնել»:
Նոյեմբերի 5-ին Մարտի 1-ի գործի անջատված մասով մեղադրյալ Ռ. Քոչարյանի դատական նիստն է տեղի ունենալու: Ս. Սաֆարյանը նշեց, որ դժվար է ասել, թե նոյեմբերի 5-ին ինչ կկատարվի, քանի որ այս գործի դատավարությունը չսկսելու և մեղադրական տեքստը հնչեցնելը խոչընդոտելու ուղղությամբ աշխատանքներ են տարվում:
Սեդա Սաֆարյանի խոսքով՝ Մարտի 1-ի գործով 80 հատոր կա, որից ինչ էլ հրապարակվի, նորություն կլինի. «Կնշվեն անձանց անուններ, որոնք անցել են այդ թոհ ու բովի միջով, տեսանելի կլինի, որ համակարգն ամբողջովին թաթախված է եղել արյան մեջ, և շատ դժվար է եղել այդ համակարգում մաքուր մնալը: Հալածանքների են ենթարկվել նրանք, ովքեր չեն ենթարկվել իշխանությանը և Մարտի 1-ին չեն մասնակցել, հետամուտ են եղել ու նրանց ազատել աշխատանքից, անգամ Հայաստանում մնալն է նրանց համար դարձել վտանգավոր… Մարտի 1-ի գործով նոր բացահայտումներ կլինեն… Կբացահայտվի նաև՝ ինչպես և ով է մեր քաղավիացիան քայքայել, ում ջանքերով և ինչու: Կզարմանաք՝ իմանալով, որ դեռ 1997-98թթ-ին վարչապետ եղած ժամանակ Ռոբերտ Քոչարյանը այդքան համարձակություն է ունեցել և որոշակի առաջարկներ է արել քաղավիացիայի հետ կապված, ամեն ինչի մեջ նրա մատը խառն է եղել: Նրա մտերիմներն են այդպիսի ցուցմունքներ տվել… Յուրաքանչյուր ցուցմունքի հրապարակման մեջ նոր միտք կգտնեք, կտեսնենք, որ անօրեն կյանքը դարձել էր մասսայական ապրելակերպ: Բացի դրանից՝ կիմանաք, որ մարտի մեկից հետո տրվել են պարգևներ, մարդիկ հարստացած են գնացել այս ու այն կողմ, օրինակ՝ Ղարաբաղ»:
Մանրամասն՝ տեսանյութում:
