Իտալական լրատվամիջոցների տվյալներով, Բեռլուսկոնին, շատ հավանական է, շաբաթը մեկ օրվա կեսը կանցկացնի Միլանի մասնագիտացված կենտրոններից մեկում՝ օգնելով սահմանափակ հնարավորություններով մարդկանց։
Իտալիայի նախկին վարչապետ Սիլվիո Բեռլուսկոնին, որը մեկ տարով դատապարտվել է ֆինանսական խարդախությունների համար, իր պատիժը կկրի հասարակական աշխատանքներ կատարելով, հաղորդում է ANSA գործակալությունը՝ հղում անելով Միլանի դատախազի տեղակալ Անտոնիո Լամանին։
Իտալիայի Գերագույն վճռաբեկ դատարանը 2013թ. օգոստոսի 1-ին Բեռլուսկոնիին դատապարտեց չորս տարվա ազատազրկման՝ նրա հիմնադրած Mediaset մեդիա խմբում մեծ աղմուկ հանած ֆինանսական խարդախությունների գործի առնչությամբ։ Միաժամանակ, կալանման ժամկետը ինքնաբերաբար կրճատվեց մինչև մեկ տարի՝ կապված 2006թ. համաներման օրենքի հետ։ Լրացուցիչ՝ դատարանն արգելեց նախկին վարչապետին երկու տարվա ընթացքում գրավել որևէ պետական պաշտոն կամ առաջադրվել ընտրություններին։ Քանի որ, դատավճռի կայացումից անցել է վեց ամիս, ապա Բեռլուսկոնիի համար պատժաժամկետն ինքնաբերաբար կրճատվել է 45 օրով և ներկայում կազմում է 10 ամիս և 15 օր։
