Իտալական Գրոսետո քաղաքի դատարանը հանձնարարել է քաղաքային խորհրդին գրանցել միասեռական զույգի ամուսնությունը, որը հարաբերությունները գրանցել է 2012 թ. Նյու Յորքում, տեղեկացնում է The Local –ը։
Ինչպես հայտնել է դատավոր Կլաուդիո Բոչինին, քաղաքային գրանցամատյանում ամուսնությունները գրանցելիս ամուսինների սեռը նշանակություն չունի, և, այդպիսով, միասեռական զույգի նշված հարաբերությունները պետք է արտացոլվեն պաշտոնական փաստաթղթերում։ «Ընտանիքի արդի հասկացությունը ձեռք է բերել նոր, ավելի լայն նշանակություն, որը ներառում է նաև ամուսնությունը նույն սեռի մարդկանց միջև»,- նշել է դատավորը։
68-ամյա ճարտարապետ Ջուզեպե Չիջիոտին և 57-ամյա լրագրող Ստեֆանո Բոուչին իրենց հարսանիքն արել էին 2012-ին Նյու Յորքում։ Սակայն հայրենիքում նրանց ամուսնությունը չէր ճանաչվել։ Զույգն այդ որոշումը վիճարկել էր դատարանում։
Մինչև վերջերս Իտալիան մնում էր Եվրամիության այն հազվադեպ երկրներից, որը չէր ճանաչում հոմոսեքսուալ միություններն ու ամուսնությունները։