«Ոչ մի ակնկալիք չունենք նոր վարչապետից, Տիգրան Սարգսյանի նման նույն օլիգարխը գալիս է վարչապետ, որ ժողովրդին նորից կեղեքի: Էս ժողովուրդը Հանրապետականին, այ մարդ, չի ուզում, դրանց երեսը տեսնել չի ուզում, հեռուստացույցով հենց ցույց են տալիս, փոխում եմ, չեմ կարողանում նայել»,- «Առաջին լրատվական»-ի հետ զրույցում այսօր կառավարության շենքի մոտ ասաց Բուզանդի 9 հասցեի խաբված բնակչուհի Քնարիկ Առաքելյանը՝ հավելելով, որ այս ամենի համար ՀՀԿ-ին պետք է ձերբակալել, որ ամբողջ ժողովրդին էս վիճակի մեջ են գցել:
Քնարիկ Առաքելյանը նշեց, որ 90-ականներին թեև շատերը անլույս և անգործ մնացին, բայց ժողովուրդն ուներ հաղթանակ, հիմա արդեն սպասելիքներ չունի ժողովուրդը:
«16-18 տարի է՝ Քոչարյանը և Սերժը եկան, երկիրը թալանեցին»,- ասաց նա՝ հավելելով, որ նոր վարչապետից ոչ մի հույս չունի, բոլորն էլ ժողովրդին խաբելով հարստացան:
«Երեկ թերթում կարդացի, որ Գալուստ Սահակյանին են փոխվարչապետ ուզում նշանակել, ծիծաղում են էլի մեզ վրա»,- ասաց Լալայանց 5 հասցեի խաբված բնակչուհի Ջուլիետա Ասատրյանը՝ հավելելով, որ եթե Հովիկ Աբրահամյանը դառնա վարչապետ, դարձյալ որևէ ակնկալիք չունի նրանից, դեռ ավելի վատ է լինելու:
Նրանք Հովիկ Աբրահամյանին կհավատային, եթե լուծած լիներ իրենց խնդիրը, մինչդեռ բազմիցս նամակով դիմել են նրան, բայց ապարդյուն:
«Սիրուշոն երեխա պետք է ունենա Ամերիկայում: Ինչո՞ւ է գնում. որ ԱՄՆ քաղաքացի դառնա: Իրեն աաջ հավանում էի, բայց որ հիմա աչքը դրել է հարստության վրա, արդեն չեմ հավանում»,- ասաց տիկին Ջուլիետան:
