Անցյալ շաբաթ Վրաստանի խորհրդարանը ընդունեց օրենսդրական փոփոխություններ, որոնցով նախատեսվում էր իրավաբանական անձի կարգավիճակ շնորհել երկրում գործող կրոնական միություններին, այդ թվում՝ Հայ Առաքելական եկեղեցուն: Վրաստանում գործող կրոնական կազմակերպություններին, այդ թվում՝ նաև Հայ Առաքելական եկեղեցուն իրավական կարգավիճակ շնորհելու մասին օրենսդրական փոփոխությունները Վրաստանում զանգվածային բողոքի ալիք են բարձրացրել և վրաց կաթողիկոս-պատրիարք Իլիա Երկրորդի ու նախագահ Միխեիլ Սաակաշվիլիի վարչակազմի միջև լուրջ հակասությունների պատճառ դարձել:
Վրաց Ուղղափառ եկեղեցու Սինոդը երկուշաբթի օրը որոշեց համաձայնության գալ երկրի իշխանությունների հետ և զսպել ժողովրդի շրջանում հուզումներն ու բողոքի գործողությունները: Իսկ երեկ Վրաստանի խորհրդարանի նիստում փոփոխություններ կատարվեցին Քաղաքացիական օրենսգրքում՝ մասնակիորեն վերացվեցին նախկինում կրոնական մի շարք համայնքների, այդ թվում՝ Հայ Առաքելական եկեղեցուն տրված կարգավիճակը: Փաստորեն, այդ նոր փոփոխություններով կրոնական համայնքներն իրավունք են ստանում գրանցվել որպես կրոնական կազմակերպություններ, իսկ նախկինում տրված լայն լիազորությունները չեղյալ են համարվում: Այս քայլով, թերևս, Վրաստանի իշխանությունների և Վրաց ուղղափառ եկեղեցու միջև լարվածությունը մեղմվեց, սակայն դրա արդյունքում Հայ առաքելական եկեղեցին չի կարող հանդես գալ օրենքով նախատեսված կարգավիճակից: Այսինքն՝ օրենքի պարզաբանման արդյունքում ընդունված օրենքն այլևս ուժ չունի, այն թույլ է տալիս փոքրամասնություններին միայն գրանցվել։
Կրոնական միությունների մասին օրենքը, դրան հետևած բուռն քննարկումները կարո՞ղ են լարվածություն առաջացնել Վրաստանի և Հայաստանի միջև. «Առաջին լրատվականը» այս հարցն ուղղեց Ռազմավարական և միջազգային հետազոտությունների վրացական հիմնադրամի տնօրեն Ալեքսանդր Ռոնդելիին, որը վստահեցրեց, որ որևէ խնդիր այլևս չկա, լարվածություն չի լինի: «Դա մի փորձ էր, քանի որ որոշները պատրիարքարանից, որոշները դրսից ցանկանում էին սրել իրավիճակը, բայց արդեն ամեն ինչ հանդարտվեց»,- նշեց նա՝ նկատի ունենալով երեկ ընդունված պարզաբանումները:
Մեր հարցին, թե ինչո՞ւ Վրաստանի ընդդիմությունը, այնուամենայնիվ, դեմ հանդես եկավ Վրաստանի իշխանությունների այդ որոշմանը, չէ՞ որ իր երկրի համար Վրաստանի նախագահը բավական խիզախ որոշում ընդունեց։ «Կարծում եմ՝ որովհետև կային որոշակի մարդիկ, ովքեր իրենց վրա վերցնում էին ավելին, քան կարող էին և պետք է վերցնեին, որովհետև նրանք սովորաբար ոչ ճիշտ հաշվարկներ են անում»,- նկատեց Ալեքսանդր Ռոնդելին:
