«Առաջին լրատվական»-ի հարցին, թե որքանով են իրար նման Թուրքիայի և Հայաստանի որդեգրած քաղաքական մշակույթը, մասնավորապես՝ վերջին շրջանում կուսակցությունների միջև ծավալված քննարկումներն ու երկխոսության միջոցով խաղաղ ներքաղաքական կյանք ստեղծելու փորձերը, Թուրքիայի «Հյուրիեթ» թերթի թղթակից Վիրջիան Զիֆլիօղլուն պատասխանեց.
«Ինչ խոսք, Հայաստանն ու Թուրքիան քաղաքական մշակույթի ինչ-ինչ դրսևորումներով նմանություններ ունեն, սակայն բուն քաղաքական առումով էապես տարբեր են,- և հավելեց,- Հայաստանը շատ երիտասարդ պետություն է, ժողովրդական, ժողովրդավարական առումներով Թուրքիայի և Հայաստանի քաղաքական վիճակը չենք կարող նմանեցնել։
Թուրքիան կարող է, ունակ է ստեղծել երկխոսության կայուն մթնոլորտ, որովհետև ժողովուրդը դրան է սպասում։ Հայաստանում երկխոսության կայացման առումով կարող եմ ասել, որ լավատես եմ, որովհետև Եգիպտոսի, Սիրիայի դեպքերը, ըստ իս, ազդեցին Ս.Սարգսյանի կառավարության վրա, և այդ առումով շատ կարևոր է, որ կուսակցությունների միջև սկսվի երկխոսություն»։