Տեղեկատվական տեխնոլոգիաների համաշխարհային համաժողովին՝ WCIT 2019-ին, որը կայացավ Երևանում, մասնակցեցին ավելի քան 70 երկրներից ժամանած 2500 մասնակիցներ, ՏՏ ոլորտի հեղինակավոր ներկայացուցիչներ, ինչպես նաև պատվավոր հյուրեր՝ ի դեմս հայազգի Քիմ Քարդաշյանի և Ալեքսիս Օհանյանի: Ինչպես կարող է Հայաստանն օգտագործել այս հնարավորությունը ՏՏ համաշխարհային ոլորտում լավագույնս ներկայանալու համար: Թեմայի շուրջ «Առաջին լրատվական»-ի հետ զրույցում Wakie հավելվածի հիմնադիր Թաթուլ Աջամյանը նշեց. «Մենք փորձում ենք լուծել այն խնդիրը, որ Հայաստանը հայտնվի համաշխարհային IT քարտեզի վրա: Դրա համար մենք պետք է ավելի հաճախ միջոցառումներ կազմակերպենք, փիար անենք, WCIT 2019-ը լավ օրինակ է, էֆեկտները հետո կտեսնենք: Մեր երկրի ինժեներական պոտենցիալը շատ մեծ է, բայց մեր մասին աշխարհում շատ քիչ բան գիտեն»:
«Մեկ տարվա ընթացքում Հայաստանը հսկայական քայլեր է արել ՏՏ ոլորտում,- նշեց մեր զրուցակիցը: -Շատ մեծ է մեր պոտենցիալը, բայց ոչ ոք չի կարող ասել, թե այն որքանով կօգտագործենք: Հայաստանում ՏՏ ոլորտը ապակենտրոնացված է, եթե անգամ սահմանները փակվեն, մենք կարող ենք մեր բիզնեսն անել, մարզերում պետք է ավելի շատ ՏՏ ընկերություններ բացվեն»:
Մեր զրուցակիցը նկատեց, որ աշխարհի ոչ մի երկրում ՏՏ ոլորտում ներգրավված չեն այնքան աղջիկներ, որքան Հայաստանում: Նրա հավաստմամբ՝ աղջիկների ներգրավվածությունը աշխարհում առավելագույնը 9 տոկոս է կազմում, իսկ Հայաստանում 30, նույնիսկ կան ընկերություններ, որտեղ 50 տոկոս են կազմում:
Թաթուլ Աջամյանի խոսքով՝ Հայաստանում ՏՏ ոլորտի խնդիրներից է մասնագետների պակասը, այս պահին 2500 թափուր տեղ կա, որոնք փորձ է արվում լրացնել արտերկրից հրավիրված մասնագետներով:
«Այսօր եկել է հենց այն օրը, երբ մարդիկ սիրահարվում են արհեստական բանականությանը»,- նշեց մեր զրուցակիցը:- Մենակության խնդիրը լուրջ խնդիր է, նախկինում մարդը միայնակ չէր կարող ապրել, սոցիալական արարած է, հիմա սոցիալական կապերի իլյուզիաներ ենք ստեղծել, բայց դա, իհարկե, չի փոխարինում իրական շփման ընթացքում ստացած էմոցիաներին:
Մանրամասն՝ տեսանյութում:
