Հայաստանի երկրորդ նախագահ Ռոբերտ Քոչարյանին այսօր առավոտյան կրկին տեղափոխել են «Իզմիրլյան» բժշկական կենտրոն։ Բժշկական կենտրոնի տնօրեն Արմեն Չարչյանը «Ազատությանը» հայտնել է, որ նախկին նախագահն այժմ բուժհետազոտություն է անցնում, և հնարավոր է, որ վիրահատվի: Մարտի 1-ի գործով առանցքային մեղադրյալ Ռոբերտ Քոչարյանը նույն բժշկական կենտրոնում բուժհետազոտություն էր անցել նաև սեպտեմբերի 30-ին:
Այն, որ ցանկացած կալանավոր, այդ թվում՝ Ռոբերտ Քոչարյանը, պատշաճ բուժսպասարկում ստանալու իրավունք ունի՝ կասկածից վեր է։ Այլ խնդիր է, որ Քոչարյանի հիվանդության վարկածը շրջանառու դարձավ բավականին վիճահարույց համատեքստում՝ ծնելով բազմաթիվ կասկածներ դրա արժանահավատության վերաբերյալ։
Մեկ տարուց ավելի է՝ Ռոբերտ Քոչարյանն անազատության մեջ է՝ որոշակի ընդմիջումներով, սակայն այս ամբողջ ընթացքում թե՛ նա, թե՛ նրա պաշտպանական թիմը երբեք չեն բարձրաձայնել երկրորդ նախագահի առողջական պրոբլեմների մասին։ Ավելին՝ Քոչարյանը հանրությանը մշտապես ներկայացել է կերպարով, որն ասոցացվում է առողջ ապրելակերպի, սպորտի հետ։
Քոչարյանի խափանման միջոցի փոփոխության բոլոր միջնորդություններն ունեցել են տարբեր հիմնավորումներ, որոնց մեջ նույնպես բացակայել է վատառողջ լինելու հանգամանքը։ Քոչարյանի հիվանդության վարկածն առաջ քաշվեց միայն այն բանից հետո, երբ դատավոր Աննա Դանիբեկյանը մերժեց նրա խափանման միջոցի միջնորդությունը, ու հասարակության մեջ վստահություն առաջացավ, որ դատական գործընթացը վերջապես դուրս կգա անվերջ թվացող տեղապտույտից, ու երկրորդ նախագահի և մյուսների գործը կքննվի ըստ էության։
Դատական երեկվա նիստում Քոչարյանի թիմը դատական գործընթացը երկարաձգելու կամ նույնիսկ վիժեցնելու թերևս վերջին փորձն արեց՝ ինքնաբացարկի միջնորդություն ներկայացնելով դատավորին, որը, սակայն, մերժվեց։ Ահա այս համատեքստում այսօր Ռոբերտ Քոչարյանը կրկին տարվում է բուժզննման, ու այս անգամ շրջանառու է դարձվում վիրահատության թեզը։ Այնպիսի տպավորություն է ստեղծվում, որ Քոչարյանը ամեն կերպ ձգտում է ձգձգել դատավարությունը, որովհետև Մարտի 1-ի գործի ըստ էության քննությունը ի դերև է անելու նրա անմեղության լեգենդը, որն ամիսներ շարունակ մոգոնվել է երկրորդ նախագահի պաշտպանական թիմի ու նրա շրջապատի կողմից վերահսկվող ԶԼՄ-ների կողմից։ Գործի քննության հետևանքով ոչ թե երկրում, այլ Քոչարյանի համար է «թեժ աշուն» լինելու. երկրորդ նախագահը վերջնականապես հրաժեշտ կտա քաղաքականությանը՝ թույլ հույս ունենալով, որ դատարանը հնարավորինս մեղմ կվարվի իր հետ։
Ի դեպ, ուշագրավ է, որ դատական գործընթացի այս օրերին «հիվանդանում» է ոչ միայն Քոչարյանը։ Նույն գործով անցնող պաշտպանության նախկին նախարար Սեյրան Օհանյանին դատարանը թույլ տվեց կարճ ժամանակով բացակայել երկրից՝ բուժօգնություն անցնելու նպատակով։ Հետո պարզվեց, որ սրտի հետ կապված խնդիր ունի նաև Արմեն Գևորգյանը, որի՝ երկրից բացակայելու միջնորդությունը, սակայն, մերժվեց։ Տպավորություն է, որ ամեն ինչ արվում է դատական գործընթացը վիժեցնելու նպատակով։
Լուսանկարը՝ Armeniasputnik-ի
