Ազգային ժողովն ընդունեց էական կարգապահական խախտման հիմքով Հրայր Թովմասյանի լիազորությունները դադարեցնելու հարցով Սահմանադրական դատարան դիմելու որոշման նախագիծը:
Այս առնչությամբ քաղաքագետ Սուրեն Պետրոսյանը «Առաջին լրատվական»-ի հետ զրույցում նշեց, որ ինքը այնքան էլ կողմ չէ հատվածային լուծումներին. «Չեմ կարծում, որ պետք է, օրինակ, առանձին անդրադառնալ Վերաքննիչ դատարանին կամ առաջին ատյանի դատարանին: Մենք պետք է ի սկզբանե ունենայինք հստակ մոտեցում՝ ինչպես բարեփոխել դատական իշխանությունը: Բոլորս էլ հասկանում ենք, որ ունենք մի հանգույց՝ ի դեմս Սահմանադրական դատարանի, որը ոչ մի կերպ չենք կարողանում բացել, և այս գործընթացը ըստ էության ուղղված է այդ հանգույցը քանդելուն: Մինչդեռ պետք է տրվեր փաստարկված գնահատական՝ մենք ինչ դատական իշխանություն ունենք: Այսինքն՝ որն է ընդհանրապես դատական համակարգի բարեփոխման ծրագիրը»:
«Քաղաքացու որոշում» կուսակցության գործադիր մարմնի անդամ Արեգ Թադևոսյանն էլ «Առաջին լրատվական»-ի հետ զրույցում կարևորեց այն հանգամանքը, թե որ Սահմանադրության մասին է խոսքը, ինչպես և ում ծառայելու համար է ընդունվել այդ Սահմանադրությունը. «Մեր սահմանադրական հիմքը կարված է այլ դերձակի կողմից այլ մարդու համար»:
Մեր զրուցակիցը խնդիր է համարում նաև բարեփոխումների մեխանիզմները. «Մեզ պետք են շատ հանգամանալից, նորմալ դիզայն արած, ճիշտ պլանավորված, պրոֆեսիոնալ և լյուստրացիայի գոնե նախնական ֆիլտրով անցած մարդկանցից բաղկացած անցումային արդարադատության որոշակի համակարգեր, որոնք կկարողանան համակարգային մոտեցում ցուցաբերել: Մինչդեռ հսկայական բուրգը երկու չամիչներով փորձում է ինքն իրեն վերափոխել, սակայն բոլորս էլ գիտենք՝ մեծ մասը չամիչը չի, այլ խմորը»:
Հարցազրույցն ամբողջությամբ՝ տեսանյութում: