Լուրեր
Փաշինյան-Ռոհանի երևանյան հանդիպումը լուրջ մեսիջներ է պարունակում. Հայաստանի նոր հնարավորությունները՝ ԵԱՏՄ-ում
  • 18:20
  • 2019-10-04
  • Դիտումներ՝ *

«ԵԱՏՄ-ն ապացուցել է իր կենսունակությունն ու գրավչությունը՝ որպես միջազգային ինտեգրացիոն միավորում և դրանում իր ներդրումն ունի Հայաստանը»,- նշել է ՀՀ վարչապետ Ն. Փաշինյանը Եվրասիական բարձրագույն տնտեսական խորհրդի ընդլայնված նիստի ժամանակ:
Թեմայի շուրջ «Առաջին լրատվականի հետ զրույցում միջազգայնագետ Սուրեն Սարգսյանը նկատեց. «Ինչ վերաբերում է ԵԱՏՄ ապագային, բավականին ակտիվ զարգացում կա, փորձ է կատարվում աշխարհագրությունը մեծացնել: Սինգապուրը և Իրանը նոր խաղացողներ են, որոնք, իհարկե, ԵԱՏՄ անդամի կարգավիճակում չեն, բայց ակտիվ ներգրավվածություն են ունենալու: ԵԱՏՄ-ի հետ առանձին բանակցություններ են վարում նաև ԵՄ անդամ որոշ պետություններ՝ երկկողմ հարաբերություններ հաստատելու համար, օրինակ՝ Հունաստանը: Նաև Իսրայելին է հետաքրքրում ԵԱՏՄ-ն: Չեմ համարում, որ ԵԱՏՄ-ն ապագա չունի, բայց որ դժվարությունների միջով պետք է անցնի և որ կան բարդություններ, ակնհայտ է…»:

Քաղաքագետ Նարեկ Մինասյանն ընդգծեց, որ Հայաստանը մեծ ջանքեր էր գործադրել, որ Իրանի և Սինգապուրի ղեկավարները Երևանում լինեին. «Իհարկե նրանք ունեն իրենց շահերը ԵԱՏՄ-ի հետ համագործակցության զարգացման առումով, ինչպես նաև Հայաստանի հետ երկկողմ օրակարգ զարգացնելու առումով: Սինգապուրի հետ, բացի ազատ առևտրի պայմանագրից, կնքվեց նաև շրջանակային համաձայնագիր, ինչը վկայում է երկկողմ կապերի ամրապնդման վերաբերյալ:
Մյուս կողմից՝ հետաքրքիր մեսիջներ էր պարունակում Փաշինյան-Ռոհանի հանդիպումը, երկկողմ համագործակցության հստակ ուղղություններ էին մատնանշվում, ինչը վկայում է, որ Իրանի հետ հստակեցվել են որոշ հարցեր, երկու կողմն էլ փորձում են արդյունք ապահովել»:

Քաղաքագետի դիտարկմամբ՝ ԵԱՏՄ-ում կարծես թե դերաբաշխում է կատարվել. «Ամեն երկիր ստանձնում է որևէ ուղղությամբ հիմնական բանակցողի դերը: Գաղտնիք չէ, որ Իրանի հետ բանակցել է Հայաստանը և այժմ բանակցում է Եգիպտոսի հետ: Սա հետաքրքիր մոդել է»:

Մանրամասն՝ տեսանյութում:

  • Դիտումներ՝ *