Դեռևս դեկտեմբեր ամսին Ուկրաինայից ու Բուլղարայից Հայաստան ներկրված հավկիթների խմբաքանակը մինչ վերջերս վաճառվել է հանրապետության խանութներում: Ինչպես արդեն տեղեկացրել ենք, միայն Երևանում, Շիրակի ու Լոռու մարզերում Սննդամթերքի անվտանգության ծառայության չորսօրյա դիտարկումների արդյունքում հայտնաբերվել է 4860 հատ ժամկետանց և թերի մակնշված հավկիթ:
Սննդամթերքի անվտանգության ծառայության մամուլի խոսնակ Արմինե Սուքիասյանը մեզ հետ զրույցում հավաստիացրեց, որ հայտնաբերված ժամկետանց հավկիթների ամբողջ խմբաքանակը վաճառքից հանվել ու ոչնչացվել է: Ընդ որում, ժամկետանց՝ ավելի քան 25 օրվա արտադրության, և թերի մակնշված հավկիթներ հայտնաբերվել էին թե խանութներում, թե ներկրողների պահեստներում: Թե որ ընկերություններն են այդ ներկրողները, ծառայությունում չեն հրապարակում:
Մեր ունեցած տեղեկություններով՝ դեկտեմբեր ամսին Հայաստան է ներկրվել մոտ 3 հազար արկղ ձու, որը մինչ այժմ վաճառվում էր Երևանում, Շիրակում ու Լոռիում: Այլ հարց է, թե ինչ իրավիճակ է հանրապետության մյուս մարզերում:
Հայաստանի թռչնաբույծների միության նախագահ Սերգեյ Ստեփանյանը «Առաջին լրատվական»-ի հետ զրույցում ասաց, որ այժմ Հայաստանում արտադրվող ձուն լիովին բավարար է պահանջարկը բավարարելու համար: «Տեղական արտադրանքի լուրջ մնացորդով ենք մոտենում Զատիկին»,- ասաց Ստեփանյանը:
«Խանութների տերեր կան, որոնք ձու են ներկրում, և ձուն կպահեն էնքան, մինչև ծախվի, փաստորեն նրանց չի էլ հետաքրքրում՝ ժողովուրդն ինչ ձու է ուտում»,-«Ժամանակի» հետ զրույցում ասաց «Լուսակերտի» թռչնաֆաբրիկայի սեփականատեր Խաչիկ Մանուկյանը՝ հավելելով. «Դեկտեմբերին ներկրված ձվերը մինչև հիմա վաճառվում էին»: Ուստի իրենք դիմել էին գյուղնախարարությանը, որ ուժեղացնեն վերահսկողությունը:
«Բացեր կան, որոնք պետք է լրացվեն: Պետք է լուրջ հետևություններ անենք էսքանից հետո: Համենայնդեպս, ներկրված ձուն ավելի էժան չի վաճառվում, քան տեղական ձուն: Ի վերջո, կան արտադրողներ, որոնք պլանավորված արտադրում են: Էսօր ներմուծելու կարիք չկա, բավարարում է ու կբավարարի: Սրանից հետո միշտ բավարարելու է ձուն»,- ասաց Մանուկյանը:
Մեր հարցին` իրենց ընկերությունը կամ տեղական այլ արտադրողներ վաճառքի չե՞ն հանում ժամկետանց հավկիթները և ի՞նչ են անում դրանք, ՀՀԿ-ական նախկին պատգամավոր Խաչիկ Մանուկյանն ասաց. «Մեր արտադրանքը մեկ շաբաթից ավելի չի մնում խանութներում, վաճառվում է: Հիմա էնպես ենք արել, որ կազմակերպենք արտադրությունն այնպես, որ մի շաբաթից ավելի ձուն չավելանա: Առավելագույնը 10 օր կարա մնա»:
ՀՀԿ-ական նախկին պատգամավոր Խաչիկ Մանուկյանը նաև չի կարծում, որ հավկիթի գների նոր թանկացում հնարավոր է: «Անցյալ տարվա հոկտեմբերից ձվի գինը չի փոխվել, նույն գինն է, միջինը 62-63 դրամ` բացթողնման գները»: Վերջինս նաև պնդում է, որ Սուրբ Զատիկի տոնակատարության հետ կապված ձվի դեֆիցիտ չի լինի:
«Վերավաճառողների խնդիրը հանել ենք մեջտեղից: Եթե առաջ առաքիչից ով ասես կարող էր առնել ձուն, առաքիչի խնդիրը ձուն ծախելն էր, ում էր ծախում` անհայտ էր, իսկ հիմա կոնկրետ խանութներ են տանում ձուն, և հստակ էդ ամեն ինչը նայվում է: Բոլոր խանութներում ձվի առկայությունը կա, գների բարձրացում չի լինի: Ձվի քանակն էլ ապահովված է: Հավկիթի արտադրությունը նորից վերելք է ապրում հիմա»,- հավաստիացրեց «Լուսակերտի» սեփականատերը:
ՀՀԿ-ական նախկին պատգամավորը հրաժարվեց պատասխանել վարչապետի հրաժարականի և իր համար ցանկալի թեկնածուի վերաբերյալ մեր հարցին:
Խաչիկ Մանուկյանից նաև հետաքրքրվեցինք, թե ինչու չի զբաղվում քաղաքական գործունեությամբ, ինչու է թողել քաղաքականությունը: «Զբաղվում եմ իմ բիզնեսներով, ազատ ժամանակ չունեմ, որ զբաղվեմ պոլիտիկայով»,- հայտարարեց Մանուկյանը՝ հավաստիացնելով, որ ՀՀԿ քաղխորհրդի նիստերին մասնակցում է: «Առանց ինձ ինչ քաղխորհրդի նիստ»:
Խաչիկ Մանուկյանը դեռ ուսումնասիրում է ՍԴ որոշումը, սակայն նաև պահումներ է անում իր աշխատակիցների աշխատավարձերից: «Ինքը՝ որպես մեխանիզմ, հետաքրքիր մոտեցում է, որ կարող է լուրջ առավելություն տալ մարդկանց: Ես ինքս տեսել եմ Եվրոպայում թոշակառուները ոնց են ապրում: Էստեղ կան բաներ, որ հստակեցված չի, եթե մարդիկ բոլորն ասում են՝ չէ, ուրեմն, մի բան կա, որ ասում են: Կա վստահության, արդարության, օրենքի ճիշտ կատարման խնդիր, պատասխանատվություն կրելու խնդիր, որովհետև բոլորը կորցրել են փողեր Հայաստանում»:Մարինե Խառատյան
