«Առաջին լրատվական»-ի զրուցակիցն է «Նախախորհրդարան»-ի անդամ Վարդան Հակոբյանը:
– Պարոն Հակոբյան, վարչապետ Տիգրան Սարգսյանի հրաժարականի պատճառների վերաբերյալ ամենատարբեր տեսակետներ են հնչում: Ըստ Ձեզ՝ միայն վարչապետի հրաժարականով երկրում դրական փոփոխություններ կլինե՞ն:
– Վարչապետին կարելի էր հեռացնել 2012թ. սեպտեմբերի 15-ին, երբ Սերժ Սարգսյանը կառավարության նիստ հրավիրեց՝ կոռուպցիոն սկանդալների, ատկատների մասին խոսակցություններ եղան: Այդ օրվանից ի վեր բազմաթիվ առիթներ են եղել, պատճառները բազմաթիվ են՝ ես դրանց չեմ ուզում անդրադառնալ:
Ինչ վերաբերում է նոր վարչապետից ակնկալիքներ ունենալուն, ապա եթե այդ վարչապետին պետք է նշանակեն նույն կառավարողները, ապա ոչ մի ակնկալիքներ, բնականաբար, չեն կարող լինել: Համակարգն ունի իր սահմանած խաղի կանոնները, ունի իր մշակած ծրագրերը, և չեն նշանակի մի այնպիսի մարդու, ով կխանգարի իրագործել այդ ծրագրերը, այնպես որ՝ նոր վարչապետից որևէ ակնկալիք չկա: Ընդհանրապես, այս կառավարման համակարգից ակնկալիք չկա՝ դա լինի վարչապետի մակարդակով, թե նախարարների:
– Քառյակն, օրինակ, այս հրաժարականը իր գործունեությամբ է պայմանավորում, մասնավորապես՝ ապրիլի 28, 29, 30-ին Ազատության հրապարակում անցկացվելիք շուրջօրյա հանրահավաքներով: Հավանական համարո՞ւմ եք:
– Եթե մեկն ուրախանում է այս հրաժարականով, դա իր խնդիրն է, ես կարծում եմ՝ այստեղ ուրախանալու որևէ բան չկա, էլ չեմ խոսում դա ձեռքբերում համարելը: Նշանակում է՝ այնքան փոքր է նրանց ձեռքբերումը, որ դա իրենց ձեռքբերումն են համարում: Մենք գործ ունենք մի արատավոր համակարգի հետ, որ ոտքից գլուխ պետք է փոխվի, որովհետև չի կարող մեկ մարդու փոփոխությունը որևէ դեր խաղալ: Չեմ կարծում, թե այս համակարգի կողմից նշանակված որևէ վարչապետ, օրինակ, հանքերի շահագործումը, ՀԷԿ-երի կառուցումը դադարեցնի, էլ չեմ խոսում նախկին տեսքին վերադարձնելու մասին: Կամ որևէ մեկը նախկին դատախազ Աղվան Հովսեփյանին ասի՝ էլ ՀԷԿ մի կառուցիր…:
– Գուցե ընդդիմադիր քաղաքական ուժերը, նախաձեռնությունները սա համարեն առաջին քայլ և սրանից հետո համակարգային փոփոխություն պահանջեն:
– Եթե դուք գիտեք ընդդիմություն կառուցվածքային առումով, որոնք համակարգային փոփոխություն են ուզում, գուցե իրենց նախաձեռնությունները բերեն փոփոխությունների: Նույնիսկ «ընդդիմություն» բառն աղավաղող, այսպիսի կոսմետիկ փոփոխություններ պահանջելով դա ուղղակի բնակչությանը զբաղեցնելու, մեդիա ոլորտը զբաղեցնելու, գոլորշին բաց թողնելու խնդիր է հետապնդում:
– Հայաստանում սոցիալ–տնտեսական ծանր պայմաններ միայն այսօր չեն, ի՞նչ եք կարծում՝ ինչո՞ւ հենց այս պահին որոշվեց փոխել վարչապետին: Ի վերջո, սոցիալ-տնտեսական ծանր պայմաններ մեր երկրում կային անցյալ, նախանցյալ տարիների ընթացքում ևս: Արտաքին ազդեցություն տեսնո՞ւմ եք:
– Ասեմ ավելին՝ մենք ավելի վատ ենք ապրելու, այն տնտեսական ճգնաժամը, որ սպասվում է Ռուսաստանին, դա անմիջապես անդրադառնալու է նաև մեր վրա: Մեր վրա խիստ ազդում է մեր արտագաղթը, նույնիսկ սննդի արտադրողականությունն է պակասել, աշխատատեղերը կրճատվում են, տնտեսական կոլապս է սպասվում: Ով կվերցնի նոր վարչապետի աթոռը՝ ես նրան ուղղակի կցավակցեմ, որովհետև նա իր վրա կվերցնի ամբողջ սպասվող տնտեսական կոլապսը:
Հարցազրույցն ամբողջությամբ՝ տեսանյութում:
