Շաբաթ օրը Լոնդոնի Վիկտորյայի և Ալբերտի թանգարանում կբացվի ժամանակակից իտալական նորաձևությանը նվիրված ցուցահանդես: Այս մասին գրում է Ria Novosti-ն:
Ցուցադրությունը կրում է «1945-2014թթ. իտալական նորաձևության փայլը»: Ցուցահանդեսն ընդգծում է ամերիկյան շուկայի դերը իտալական ֆեշն-արդյունաբերության մեջ: Հոլիվուդյան աստղերը՝ Գրեյս Քելին, Օդրի Հեփբերնը և Էլիզաբեթ Թեյլորը, գնել են իտալացի դիզայներների հագուստներ և աքսեսուարներ:
Կարևոր ցուցանմուշներից են Թեյլորի մանյակը և մատանին, որոնք նրան է նվիրել ամուսինը՝ Ռիչարդ Բերթոնը, և նրա չորրորդ ամուսնու՝ Էդի Ֆիշերի նվիրած կրծքազարդը: Այնտեղ կարելի է տեսնել նաև օպերային երգչուհի Մարիա Կալասի համար կարված վերարկուն, Ավա Գարդների երեկոյան զգեստը, ինչպես նաև Օդրի Հեփբերնի՝ «Պատերազմ և խաղաղություն» ֆիլմից երեկոյան զգեստը:
Ցուցադրության առանձին սրահ նվիրվել է նաև տղամարդկանց հագուստի ցուցադրությանը:
