Newsru.co.il կայքի փոխանցմամբ՝ Թուրքիայի արտգործնախարար Ահմեդ Դավութօղլուն Իրանի ղեկավարությանը կոչ է արել դադարեցնել աջակցությունը Սիրիայի նախագահ Բաշար Ասադի ռեժիմին՝ ընդդիմության ելույթները ճնշելու համար։
Այսօր «Ալ-Շարք Ալ-Աուստատ» թերթը գրել է, որ Ահմեդ Դավութօղլուն պատրաստվում է մոտ ապագայում այցելել Սիրիա և Բաշար Ասադին վերստին հորդորել` իրականացնելու անհրաժեշտ ժողովրդավարական բարեփոխումներ։ Սակայն թուրքական ղեկավարությունն աստիճանաբար սկսում է հիասթափվել սիրիական ռեժիմի՝ ճկունություն ցուցաբերելու ունակությունների հարցում։
Թեհրանում Դավութօղլուն հանդիպումներ է ունեցել նախագահ Մահմուդ Ահմադինեժադի, խորհրդարանի խոսնակ Ալի Լարիջանիի և իր իրանցի գործընկեր Ալի Աքբար Սալեհիի հետ։
Թուրքական Today’s Zaman թերթն իր հերթին գրում է, որ բանակցությունների ընթացքում Դավութօղլուն անհանգստություն է հայտնել սիրիական զարգացումների նկատմամբ։ Դավութօղլուն նորից հնչեցրել է տարածաշրջանի երկրների մշտական խորհրդակցությունների անցկացման անհրաժեշտության մասին իր գաղափարը և ընդգծել, որ Սիրիան թե՛ Իրանի, թե՛ Թուրքիայի համար բարեկամական երկիր է, ուստի երկու երկրները պետք է հասնեն Սիրիայում բռնությունների դադարեցմանը։
Հիշեցնենք, որ Ահմեդ Դավութօղլուն իր մերձավորարևելյան շրջագայության շրջանակներում մտադիր է, Իրանից ու Սիրիայից բացի, այցելել նաև Լիբանան, Սաուդյան Արաբիա և Բահրեյն։
