Ինչպես ավելի վաղ էին հայտնում, Հայաստանում Ուկրաինայի արտակարգ և լիազոր դեսպան Իվան Կուխտան հետ է կանչվել հայրենիք՝ խորհրդակցությունների համար: Հիշեցնենք, որ դեսպանի հետկանչումը նախորդել է մարտի 27-ին Ուկրաինայի տարածքային ամբողջականությանն աջակցելու հարցով ՄԱԿ-ի Գերագույն Ասամբլեայի քեվերակությանը, որը Ղրիմում տեղի ունեցած հանրաքվեն անօրինական և անվավեր է ճանաչել:
Նշենք նաև, որ նախօրեին հայկական ԶԼՄ-ներին հայտնի է դարձել, որ դեսպանի վերադարձը հարցականի տակ է դրվել այն բանից հետո, երբ մարտի 27-ին Հայաստանը ՄԱԿ-ի Գերագույն Ասամբլեայում Զիմբաբվեի, Սուդանի, Բելառուսի և այլ երկրների հետ, ընդհանուր թվով՝ 11 երկիր, 100 «կողմ» քվերակածների դիմաց «դեմ» է քվեարկել Ուկրաինական բանաձևին՝ այդպիսով աջակցելով Ռուսաստանի դիրքորոշմանը:
Կիևի «Առաջին լրատվական»-ի՝ Ուկրաինայում գործող իշխանությանը մոտ հուսալի աղբյուրների հաղորդմամբ՝ հայտնի է դարձել, որ, այնուամենայնիվ, Ուկրաինայի դիվանագիտությունն ուշադրություն է դարձնում հանգամանքներին, որոնց ճնշման ներքո հայկական կողմն ընդունել է ՄԱԿ-ի Գերագույն Ասամբլեայում քվերակության ժամանակ Ռուսաստանին աջակցելու մասին հայտնի որոշումը և մտադիր չէ իրավիճակը դրամատիզացնել դեմարշներով կամ այլ խիստ պատասխան միջոցներով: Ավելին՝ մեր աղբյուրները հայտնել են, որ շուտով պրն Կուխտան կվերադառնա Երևան և կշարունակի նախկին ռեժիմով իրականացնել իր պարտականությունները: Ստույգ ժամկետներ առայժմ չեն հաղորդվում, բայց ինչպես պարզաբանել են աղբյուրները, ամենայն հավանականությամբ, Ուկրաինայի դեսպանը Երևանում կլինի մինչև Զատիկ՝ ապրիլի 20-ը:
